गजलः साथीले भन्यो

गजलः साथीले भन्यो
¤आवाज शर्मा¤
¤
पाइला पाइला चुनौति छ साथीले भन्यो ।
काँढा नै त जिन्दगी हो बागीले भन्यो ।।
¤
मैले बल्दा मात्र न हो तिम्रो उज्यालो ।
म निभ्छु र सबै निभ्छ बातीले भन्यो ।।
¤
बाँचे मात्र यो संसार देख्न पाइन्छ ।
गीता छोई ढाँट्छु अचेल साक्षीले भन्यो ।।
¤
तिमी मेरो भर परेर चढ्छौ डुंगामा ।
मैले सँधै देवी भाक्छु माझीले भन्यो ।।
¤
ऐले आराम गर अझै तिम्रो पालो छ ।
भरे छानो उडाउँछु आँधीले भन्यो ।।
31/12/2011

गजलः र पो रोएँ

गजलः र पो रोएँ
¤आवाज शर्मा¤

दियो बाल्दै अँधेरीमा हिड्यौ तिम्ले र पो रोएँ ।
म भित्रैको म को हू ? त्यै, चिन्यौ तिम्ले र पो रोएँ ।।

सँगै हुन्थ्यौ सँगै खेल्थ्यौ सँगै जित्थ्यौँ सँगै हार्थ्यौ ।
म हार्दा मैँ बरू हाँस्थे, जित्यौ तिम्ले र पो रोएँ ।।

थियो यौटा सिमारेखा, म बैरी हूँ नभन्दा नि ।
जित्यौ गुनले, नियम कानून, मिच्यौ तिम्ले र पो रोएँ ।।

सयौँ चोटी झर्‍यो भाग्यऽ, नदेखेँ झैँ गरे मैले ।
त्यही मौका अनायासै, टिप्यौ तिम्ले र पो रोएँ ।।
25/12/2011

गजलः बगरसंगै

गजलः बगरसंगै
¤आवाज शर्मा¤
¤
बालुवामा रहर कोरी रम्न खोज्दा बगरसंगै ।
दुख्छ छाती हुरी चल्दा भत्किएको खबरसंगै ।।
¤
स्वप्न बाल्दै अँधेरीमा ज्योति खोज्दै थियो कोही ।
बल्झियो ऊ बिरानीमा देख्छु मुर्दा शहरसंगै ।।
¤
लक्ष्य के हो ? कहाँ पुग्ने ? उफ् यो कस्तो नशा होला ?
युद्ध जित्दा अझै पीडा काटिएका सफरसंगै ।।
¤
ओखती हो पिऊँ भन्थेँ बिर्सिने हो बहाना त ।
पिउन थाले झझल्को झन् बढ्छ त्यही अशरसंगै ।।
¤
शंख, चीता र यो आगो मात्र केही बहाना हुन् ।
मारिएथेँ, थियो तिम्रो घात पैलो नजरसंगै ।।
ऽ।ऽऽ ।ऽऽऽ ऽ।ऽऽ ।ऽऽऽ
09/12/2011

गजलः के चाहियो र ?

गजलः के चाहियो र ?
¤आवाज शर्मा¤
¤
बरू जाती नबोल्दै यी कुरा के चाहियो र ?
बचन पुग्छन् कलेजीमैँ छुरा के चाहियो र ?
¤
घरै आगो लगाएसी खरानीको के दुःख ।
मुठी खोज्दै भुले भैगो मुरा के चाहियो र ?
¤
कता जान्छौ यता भट्टी उता छे कामदेवी ?
जुधे आँखा नशा छायो सुरा के चाहियो र ??
¤
सँधै नौला नयाँ खालका बहाना रच्न सक्छ्यौ ।
कसम खायौ सिँदुर पोते चुरा के चाहियो र ??
¤
म आँ गर्दा अलग्गै त्यो अलङ्कार बुझ्न सक्थेँ ।
जो छर्लङ्गै छ आधामा पुरा के चाहियो र ??
।ऽऽऽ ।ऽऽऽ ।ऽऽऽ ।ऽऽ
21/12/2011

गजलः सँगै हो नि

गजलः सँगै हो नि
¤आवाज शर्मा¤

माया भन्नु बत्ती न हो लोभिने त सँगै हो नि !
पर्ख पर्ख हे पुतली होमिने त सँगै हो नि !!

यिनै दुई नजरभित्र हजार आशा बाँचेका छन् !
कतै हाँसो कतै आँशु पोखिने त सँगै हो नि !!

सपनाको सानो गाउँ त्यहीँ हाम्रा रहर फुल्छन् !
बस्तीभित्र कुहिरो पसे छोपिने त सँगै हो नि !!

कुनै मेरा कुनै तिम्रा केही दोष यो समाजका !
दुख्दा छाती तोडिँदा मन तोडिने त सँगै हो नि !!

कहाँ सम्म कुद्ने रै छस् ए जिन्दगी म भन्दा तँ !
धुक्धुकीको चाल रुक्दा रोकिने त सँगै हो नि !!
08/12/2011

गजलः नहोस् बरू

गजलः नहोस् बरू
¤आवाज शर्मा¤
¤
यस्तो बिमार चढे हुन्थ्यो निदान नहोस् बरू ।
पाउ राख्ने ठाउँ मिलोस् सिरान नहोस् बरू ।
¤
आकासका तारा गन्दै झर्दा सँगै झरूँ ।
मलाई त्यो रात देऊ बिहान नहोस् बरू ।।
¤
सजायँ देऊ म सहन्छु ऐया भन्ने छैन ।
को हो दोषी के हो दोष किटान नहोस् बरू ।।
¤
तिम्रा हुकुम मेरो निम्ति अक्षर ढुंगामा झैँ ।
चल्छ, चल्छु, नियम कानुन बिधान नहोस् बरू ।।
¤
सक्छौ भने यस्तो हान्नू आवाज निस्सासियोस् ।
घाउ लागोस् कलेजीमै निशान नहोस बरू ।।
25/11/2011

गजलः याद आयो

गजलः याद आयो
¤आवाज शर्मा¤

उही चोखो प्रेम मीठो निशानीको याद आयो ।
उनी आइन् फेरि उस्तै जवानीको याद आयो ।।

सँधै दुख्ने भाग्य यस्को बिना दोषै रुझ्छ भिज्छ ।
हुँदा एक्लै दुःख साट्ने सिरानीको याद आयो ।।

मधूकरकी मालती झैँ म हूँ भन्थिन् जन्म जन्म
कसम सम्झेँ ती पुराना कहानीको याद आयो

उनी हाँस्दा फूल हाँस्थ्यो म लोभिन्थेँ चाँदनीमा
उनै जादू, कोमलाङ्गी, हिमानीको याद आयो ।
।ऽऽऽ ऽ।ऽऽ ।ऽऽऽ ऽ।ऽऽ
08/11/2011

गजलः तिमी मुस्कुरायौ

गजलः तिमी मुस्कुरायौ
¤आवाज शर्मा¤

जहाँ चस्स दुख्थ्यो उहीँ मुस्कुरायौ ।
छ कस्तो रहस्यऽ मसङ्गै लुकायौ ।।

सक्यौ थाम्न भाला हजारौँ थरीका ।
दुख्यौ किऽ त भन्दै यता सुम्सुम्या यौ ।।

न आधार छ बाँच्ने न पो मर्न दिन्छन् ।
सह्यौ चोट हाँसी मलाई रुवायौ ।।

जता हेर्छु उस्तै थिएँ त्रासदीमा ।
सबै पीर चिन्ता निमेषमै भुलायौ ।।

कुनै छैन बाटो म आवाज सुन्थेँ ।
भई आश मीठो तिमी गुन्गुनायौ ।।
05/11/2011
।ऽऽ ।ऽऽ ।ऽऽ ।ऽऽ

गजलः मन

गजलः मन
¤आवाज शर्मा¤

पिरोलिन्छ छाती छिरोलिन्छ मन
हुँदै अश्रु बर्खा निचोरिन्छ मन

जहाँ बाल्छु दीयो चोखो प्रेमको
चली दुष्ट आँधी बिथोलिन्छ मन

पराई कसैको गरी सम्झना
सँगै हुन्न आफ्नै बिछोडिन्छ मन

कुनै आँकुरा झैँ पलाएर आश
तुषारो नपर्दै निमोठिन्छ मन

कुनै छैन चिन्ता म हार्दा बरू
अरूले जितेमा चिमोटिन्छ मन

सँधै गुम्सिएको छ आवाज यो
चिरा पर्छ छाती र पोखिन्छ मन

(भुजङ्गी)
04/11/2011

गजलः अभिशाप खोज्दैछु

गजलः अभिशाप खोज्दैछु म
¤आवाज शर्मा¤

निस्सासिएँ आशीषले अभिशाप खोज्दैछु म।
फँस्दा अझै मज्जा बढोस् हो धराप खोज्दैछु म ।।

मेरा सयौँ बाटाहरू मसँगै हराए कतै ।
गन्तब्यमा डोह्र्याउने पदचाप खोज्दैछु म ।।

मात्रै सहेँ घोच्यौ डस्यौ बदला छ बाँकी हिसाब ।
फाँसी हुँदा लज्जा नहोस् त्यति पाप खोज्दैछु म ।।

आडम्बरी मुर्दाहरू त डराउँछन् मर्न रे
लड्दै मरूँ त्यै मृत्युको अनुलाप खोज्दैछु म ।।

आफूसितै बिद्रोहको पुजनीय सिद्धान्तमा
गौरब गरूँ गल्ती हुँदा परिताप खोज्दैछु म ।।
SSIS SSIS IISI SSIS
16/10/2011

गजलः नरम नरम

गजलः नरम नरम
¤आवाज शर्मा¤

बिझ्ला बरू कपासले काँढा नरम नरम किन ?
आगो थियो चिसो बरू यो हिउँ अझै गरम किन ?

कस्तो मिठो उकुसमुकुस, यो छट्पटी र गुद्गुदी
आकासमा उडेँ कि खै? पन्छी सरी भरम किन ?

आफूसितै लुकौँ लुकौ भागौँ कि झैँ सँधै अचेल
विश्वास भो पराइको आफूसितै सरम किन ?

धर्ती भरी म खोज्छु जून छायाँ उता गगनतिर
पाइन्न जे कसै गरी उस्कै खोजी चरम किन ?

SSIS ISIS SSIS ISIS
बहरे रमल मख्बून
14/10/2011

गजलः नरम हुन्छ

गजलः नरम हुन्छ
¤आवाज शर्मा¤

जति साह्रो हान्छौ मुटु त्यत्ति नरम हुन्छ मेरो ।
मुस्कुराउँछु जब त्यही चोट मलम हुन्छ मेरो ।।

मेरो भक्ति मेरो पूजा केवल तिम्रै बरिपरी ।
तिम्रो नाउँ सम्झी आफ्नो घरमा कदम हुन्छ मेरो ।।

अचानो झै बिनादोष छिया छिया बनाएसी ।
बल्ल 'हारेँ' भन्छौ जब ब्यर्थै सरम हुन्छ मेरो ।।

सबै भन्छन् सँधै हाँस्छ्यौ के राज हो यो खुशीको
उजेलीमा आँशु थाम्ने कडा नियम हुन्छ मेरो ।।

साथीहरू सित कुनै गुनासो र द्वेश छैन ।
साँच्चै भनूँ, आफ्नासित अपेक्षै कम हुन्छ मेरो ।।
07/10/2011

गजलः बा

गजलः बा
¤आवाज शर्मा¤

शान्तिको बिहानी, उदाउँछ कि बा ?
लाटाले मालसिरी, सुनाउँछ कि बा ?

आँङ चैँ बसेकै हो, पेट नि खसेकै हो ।
यसपाली त गोरु, बियाउँछ कि बा ?

पराल फालेकै हो, दाना हालेकै हो ।
घोडाको सिङ कतै, पलाउँछ कि बा ?

झिँजा जोरेकै हो, सलाई कोरेकै हो ।
पानीमा डढेलो, लगाउँछ कि बा ?

दूरी नापेकै हो, खुट्टा थापेकै हो ।
हुटिट्याउँले सगर, अड्याउँछ कि बा ?
30/09/2011

गजलः यहाँ कोही

गजलः यहाँ कोही
¤आवाज शर्मा¤

अरू निभे निभ्न मात्रै बल्छन् यहाँ कोही
नेपथ्यका चालसङ्गै चल्छन् यहाँ कोही

पाए जरा सम्म खन्छन् आफ्नै जमीन् हुन्न
टुप्पातिरै उम्रिएसी ढल्छन् यहाँ कोही

सत्तो सराप ब्यर्थ आरोप नाना कुरा काट्छन्
खाँचो परे पाउ उस्कै मल्छन् यहाँ कोही

कोक्याउँछन् डस्न सक्छन् घातै समेत गर्छन्
औला उठे कर्कलो झैँ गल्छन् यहाँ कोही

भन्छौ तिमी जल्नलाई आगै नभै हुन्न
म झुल्किनै हुन्न सत्ते जल्छन् यहाँ कोही
SSIS SISS SSIS SS
बहरे मुजास मक्तुअ
25/09/2011

गजलः इर्ष्यालु चाँदनीले

गजलः इर्ष्यालु चाँदनीले
आवाज शर्मा

इर्ष्यालु चाँदनीले तारिफ गरेन तिम्रो
त्यै डाहले झर्‍यो फूल आभा झरेन तिम्रो

कञ्चन् हिमाल जस्तै जादूगरी छ स्पर्श ।
झन् तिर्सना थपिन्छ चाहत मरेन तिम्रो ।।

रिमझिम नशालु आँखा चञ्चल हरिणसरीका ।
आफै ढल्यो सिकारी सामू परेन तिम्रो ।।

यौटा छ ठाउँ बाँकी सृङ्गार अपूर्ण छाड्यो ।
कालीगढी अचम्मै स्युँदो भरेन तिम्रो ।।

सँस्कार उच्च बोकी हिड्छ्यौ कुलीन 'बाला' ।
संघार भित्र बन्दी पाइला सरेन तिम्रो ।।
SSI SISS SSI SISS
23/09/2011

गजलः सपना जलेपछि

गजलः सपना जलेपछि
¤आवाज शर्मा¤

अनयास यी सपना जले पछिका कुरा ।
भो नसोध भो पिउँदै ढले पछिका कुरा ।।

जिउने मजा यसरी लिएँ कसरी भनूँ ?
अझ झन् छुरा मुटुमा चले पछिका कुरा ।।

न त लालिमा न भयो उषा न छ आश क्यै ।
छ उही निशा जुनले छले पछिका कुरा ।।

अनुभूतिको मरुभूमिमा म कहालिएँ ।
सपनाभरी असिना फले पछिका कुरा ।।

कुहिरोसरी छ जताततै किन हो किन ।
मुटुमा धुवाँ छ चिराग बले पछिका कुरा।।

17/09/2011
बहरेः कामिल
IISIS IISIS IISIS

गजलः यो शहरमा

गजलः यो शहरमा
¤आवाज शर्मा¤

आफ्नोबाटै घात होला मान्छे चिन्नू यो शहरमा ।
जे नि गर्छन् साथमा इँट बोकिहिड्नू यो शहरमा ।।

जिन्दगी हो चक्र यौटा, लामो बाटो चर्को धूप ।
जीउ पूरै ढाक्न पाटे कात्रो भिर्नू यो शहरमा ।।

कालो पोत्ने या त पोल्ने कोइलाको धर्म नै हो ।
आफ्नु बन्दा मिच्न सक्छन् च्वास्स बिझ्नू यो शहरमा ।।

चाकडी, तेल् घस्न जान्नू, सर्प बन्नू, डस्न जान्नू ।
खाँचो पर्दा जल्नुपर्छऽ आगो निल्नू यो शहरमा ।।

मूल्य कस्तो राख्न सक्छौ यो बजारको खाँचो के छ ?
भाउ तोकी आफ्नो आत्मा बेच्न सिक्नू यो शहरमा ।।

यन्त्र जस्तै चल्छ मुर्दा, यो शहर हो, सुन्छ आवाज ।
सुम्सुम्याऊ काँडो भेटे फूल मिच्नू यो शहरमा ।।
16/09/2011
SISS SISS SISS SISS

गजलः देख्छु सानूलाई

गजलः देख्छु सानूलाई
¤आवाज शर्मा¤

ऋतु सङ्गै फेरिएको देख्छु सानूलाई ।
भूमरीमा घेरिएको देख्छु सानूलाई ।।

मैले काँडा भाँच्न खोज्दा भो कठै भो भन्थिन् ।
फूल चुँड्दा हेरिएको देख्छु सानूलाई ।।

पढ्न भन्थ्यौ जिन्दगीका पत्र पल्टाएर ।
क्यै नबुझ्ने केरिएको देख्छु सानूलाई ।।

घाउ लाग्दा मुस्कुराउछिन् आँशु देखाउन्नन्
त्यै खुशीमा सेरिएको देख्छु सानूलाई ।।

साँझ पर्दा दीप बाली धूप सल्काए नि ।
त्यै धुँवा झैँ बेरिएको देख्छु सानूलाई ।।
SISS SISS SISS SS
15/09/2011

गजलः बानी परेन तिम्रो

गजलः बानी सरेन तिम्रो
¤आवाज शर्मा¤

मौका हजार पायौ बानी सरेन तिम्रो ।
झुक्याउँदै रमायौ तृष्णा मरेन तिम्रो ।।

भन्दै महान जनता तिन्कै करङ चढेर ।
निर्लज्ज लुट्न सक्ने धुर्त्याँइ झरेन तिम्रो ।।

सत्ता नपाउँदामा सुस्ता पुगेर बास्छौ ।
मन्त्री हुँदा सिमामा आँखा परेन तिम्रो ।।

गर्दै झुटा बहाना भोकाहरू फँसाई ।
खेल्दा नि भावनामा खाँचो टरेन तिम्रो ।।

बेचेर राष्ट्रिएता गर्दै अनेक कुकर्म ।
दौलत अकूत थुपार्र्यौ धोक्रो भरेन तिम्रो ।।
SSI SISS SSI SISS
छन्दः दिक्पाल
13/09/2011

गजलः साँझ नपर्दै

गजलः साँझ नपर्दै
¤आवाज शर्मा¤

छट्पटिन्छु हरेक पलपल साँझ नपर्दै
त्यसै त्यसै लाग्छ तलतल साँझ नपर्दै

बिर्सूँ भन्दा बिर्सनेकै याद बल्झियो
उस्कै तश्वीर देख्छु झलझल साँझ नपर्दै

कोल्टे फेर्दै बिते मेरा रात बिराना ।
चस्स घोच्छ बिझ्छ मलमल साँझ नपर्दै ।।

उकुसमुकुस हुन्छु जब न्याउली झुराउँछे ।
पसिनाले रुझ्छु खलखल साँझ नपर्दै ।।

माकुरीले जाल बुनेछ हिड्ने बाटोमा ।
जीवन यात्रा भयो दलदल साँझ नपर्दै ।।
09/09/2011

गजलः झर्दै नझर्ने फूल

गजलः झर्दै नझर्ने फूल
¤आवाज शर्मा¤

झर्दै नझर्ने फूल जस्तै भावना
कैलै नमर्ने प्रीत हाम्रो कामना

हामी नजागी क्रान्ति पक्कै हुन्न है
अमर शहीद भै कीर्ति राख्ने चाहना

यी हात हुन्छन् मुक्त टुट्छन् हत्कडी
आऊ नहारौँ युद्ध अर्को याचना

धर्ती उज्यालो हुन्छ नौलो ज्योतिले
पार्दिन्छु आकास मुग्ध छर्दै बासना

प्रत्येक मोर्चाबाट आवाज उर्लियो
भेट्नेछु पक्कै लक्ष्य थालेँ साधना
SSIS SSIS SSIS
08/09/2011

गजलः सानू तिमी कहाँ छौ

गजलः सानू तिमी कहाँ छौ
¤आवाज शर्मा¤

पलपल चिरिन्छ छाती सानू तिमी कहाँ छौ ?
सम्झेर रुन्छु राती सानू तिमी कहाँ छौ ??

मनमा छ अग्निज्वाला सल्क्यो बनी ढढेलो ।
दन्केर बल्छ बाती सानू तिमी कहाँ छौ ??

भाकेर देउराली ढोगी शिला शिलामा ?
राख्थ्यौ नि फूल पाती सानू तिमी कहाँ छौ ??

गल्ती गरेछु मैले थाहा भएन पैले ।
सोचेँ अझै नजाती सानू तिमी कहाँ छौ ??

माया थियो कि तृष्णा सम्बन्धको धरातल ?
झुल्केन खै प्रभाती सानू तिमी कहाँ छौ ??
SSI SISS SSI SISS
बहरे मुजारे मुसम्मन अखरब
छन्दः दिक्पाल
06/09/2011

गजलः किन होला रातभरि

गजलः रातभरि
¤आवाज शर्मा¤

यी आँखामा साउने झरी किन होला रातभरि ?
पोल्छ छाती घरी घरी किन होला रातभरि ??

कोल्टे फेर्दै छट्पटिन्छु निद्रा अझै पर भाग्छ ।
ताना चल्छन् नानाथरी किन होला रातभरि ??

उता जोडी बाँधिएर कोइलीले गीत गाउँछ ।
यता एक्लै रुन्छे चरी किन होला रातभरि ??

जहाँ दिउँसै रात पर्छ उज्यालोमै हुचील बास्छ ।
पराइ बन्छन् आफ्नै धरी किन होला रातभरि ??

हेर्दा हेर्दै तारा खस्यो आकास कहाँ रित्तियो र ?
जीवन मृत्यु सरिबरी किन होला रातभरि ??

यौटा आवाज निस्सासिन्छ अर्को आवाज बिलाउँछ ।
सन्नाटा छ वरिपरी किन होला रातभरि ??
05/09/2011

गजलः साँझ ढलेपछि

गजलः साँझ ढलेपछि
¤आवाज शर्मा¤

निस्सासिँदो हूरी चल्छ साँझ ढलेपछि ।
किस्तावन्दी जीवन ढल्छ साँझ ढलेपछि ।।

दीयो हेर्दै टोलाउँछु बतास बौलाउँछ ।
सलेदो झैँ आशा जल्छ साँझ ढलेपछि ।।

ऐँजेरू झै सम्बन्धका पत्र केलाउँदै ।
बाँझो रहर पाक्छ गल्छ साँझ ढलेपछि ।।

समर्पणको हिसाव गर्छु देख्छु मात्रै
घाटा
आस्था झुक्छ तृष्णा फल्छ साँझ
ढलेपछि ।।

एउटा आगो निभाउन हजार राँका झोस्छु ।
प्याला भित्रै सागर बल्छ साँझ
ढलेपछि ।।

उता बत्ती धिप्प निभ्छ यता आवाज सुक्छ

मृत्यु आउँछ ढाँट्छ छल्छ साँझ
ढलेपछि ।।
02/09/2012

गजलः पुर्णिमाको मज्जा

गजलः पुर्णिमाको मज्जा
¤आवाज शर्मा¤

पुर्णिमाको मज्जा कहाँ रातै नभै त ।
त्यो नशा खै के को नशा मातै नभै त ।।

छट्पटीमा भिज्दै गयो तिम्रो सिरानी ।
मर्म यस्को खुल्ला र खै?! बातै नभै त ।।

फूल छाडी काँढा चुन्यौ बाटो बिरायौ ।
चोट प्यारो लाग्थ्यो कहाँ घातै नभै त ।।

भेट यस्ता आत्मीय छन् भुल्नै नसक्ने ।
नाउँ के दिऊँ ? सम्बन्धको नातै नभै त ।।

पालुवा हो यो जिन्दगी मौसम अनेकौ ।
फूलकै के अस्तित्व भो पातै नभै त ।।
27/08/2011

गजलः रातै हुँदैन

गजलः रातै हुँदैन
¤आवाज शर्मा¤

उज्यालो मन भैदिएमा रातै हुँदैन ।
अँध्यारोमा हिड्न जाने घातै हुँदैन ।

सबै केबल स्वार्थ साँध्ने आडम्बरी रे ।
कता खोज्छौ सत्य साँचो नातै हुँदैन ।।

पढे सक्छौ जिन्दगी यो, आऊ तयार छु ।
खुला पुस्तक बन्छु छोप्ने गातै हुँदैन ।।

सबै आफ्ना मात्र हुन्छन् हुन्नन् पराई ।
जहाँ भाषा, धर्म, संस्कार, जातै हुँदैन ।।

इशारामै खुल्छ प्रत्येक गम्भीर रहश्य ।
यहाँ आँखा आत्म बोल्छन् बातै हुँदैन ।।
24/08/2011

गजलः रोएको छु

गजलः रोएको छु
¤आवाज शर्मा¤

कैले दुख्दै रोएँ कैले दुखाउँदै रोएको छु
कैले झुक्दै रोएँ कैले झुकाउँदै रोएको छु

नियतीका प्रहारसँगै कैले यता कैले उता
कैले जुध्दै रोएँ कैले जुधाउँदै रोएको छु

छातीभित्रै आगो बल्दा उसिनिने मन मेरो
कैले बुझ्दै रोएँ कैले बुझाउँदै रोएको छु

एउटै नदी साझा डुङ्गा कोशौ टाढा दुइटा मन
कैले डुब्दै रोएँ कैले डुबाउँदै रोएको छु

बाँधिएर जुगैभरी पराइको अँगालोमा
कैले लुट्दै रोएँ कैले लुटाउँदै रोएको छु
24/08/2011

गजलः उजेलीलाई

गजलः उजेलीलाई
¤आवाज शर्मा¤

कता छोपूँ उदाएको, उषा लाली उजेलीलाई ।
यसै गाली गर्‍यौ ब्यर्थै, बिहानीको जुरेलीलाई ।।

दुवालीमा के छेकिन्थ्यो, पहाड फोड्ने नदीको बेग् ।
तिमी छेक्ने हिसाब गर्छौ, नदी गर्जन सुसेलीलाई ।।

उमेर संगै सुवास चढ्दा, सयौँ आशा यसै बढ्छन् ।
नफुल बास्ना नछर भन्छौ, बगैचाकी चमेलीलाई ।।

नबुझ्दा नै थियो जाती, बुझेँ उल्टै दुख्यो छाती ।
जवानीमा नसुल्झेका सयौँ तिम्रा पहेलीलाई ।।

ISSS ISSS ISSS ISSS
बहरे हजज
छन्दः विधाता
30/07/2011

गजलः उजेलीलाई

गजलः उजेलीलाई
¤आवाज शर्मा¤

कता छोपूँ उदाएको, उषा लाली उजेलीलाई ।
यसै गाली गर्‍यौ ब्यर्थै, बिहानीको जुरेलीलाई ।।

दुवालीमा के छेकिन्थ्यो, पहाड फोड्ने नदीको बेग् ।
तिमी छेक्ने हिसाब गर्छौ, नदी गर्जन सुसेलीलाई ।।

उमेर संगै सुवास चढ्दा, सयौँ आशा यसै बढ्छन् ।
नफुल बास्ना नछर भन्छौ, बगैचाकी चमेलीलाई ।।

नबुझ्दा नै थियो जाती, बुझेँ उल्टै दुख्यो छाती ।
जवानीमा नसुल्झेका सयौँ तिम्रा पहेलीलाई ।।

ISSS ISSS ISSS ISSS
बहरे हजज
छन्दः विधाता
30/07/2011

गजलः तलास हूँ

गजलः तलास हूँ
¤आवाज शर्मा¤

कस्तुरी म खोजिएर नटुङ्गिने तलास हूँ ।
साथ हुन्छु छुन्छु चुम्छु नदेखिने बतास हूँ ।।

पलाउँदा छट्पटी र उकुस मुकुस नजानिदो
सुस्त सुस्त नीँद खोस्छु बिझाउने कपास हूँ ।

लक्ष्य आफ्नु प्राप्ति आफ्नु खुशी छु यै अभावमा
रातमा नि चम्किरहने म जूनकिरी प्रकास हूँ

भमराको भोग्य वस्तु हुने रहर ममा कहाँ ?
भित्र लुक्छु हो देखिन्नँ पलाँसको सुवास हूँ ।

जिन्दगीको दीप बाल्छु म हुन्छु हर रहरभरि
बाँचेसम्म साथ दिन्छु म आश हूँ म स्वास हूँ ।
20/07/2011

गजलः नेपालीको

गजलः नेपालीको
¤आवाज शर्मा¤

सीमा मिच्यो दशगजामा बास थियो नेपालीको ।
पसिनाको कमाइ लुट्यो गास थियो नेपालीको ।।

हत्कडी हो फेरिएको मात्र जेल हो सारिएको ।
साँच्चै रिहा हुन्छु भन्ने आश थियो नेपालीको ।।

मझधारमा पुग्दैखेरी जानाजानी डुँगा डुब्यो ।
मर्‍यो भनी छाडेपनि सास थियो नेपालीको ।।

केटाकेटी जस्तै गरी आगो खेले रमितेले।
घर जलेर खरानीको रास थियो नेपालीको ।।

खस मधेसी जनजातीको भोज चल्दै थियो यता ।
त्यहीँ कतै छियाछिया लास थियो नेपालीको ।।
14/07/2011

गजलः रात बाँकी रै छ अझै

गजलः रात बाँकी रै छ अझै
¤आवाज शर्मा¤

भर्खरै जून, पारी डुब्यो, रात बाँकी, रै छऽ अझै ।
कुन्नि के भो, निद्रा पुग्यो, रात बाँकी, रै छऽ अझै ।

दुनियाको आँखा छली पाप गर्छन ठूला बडा
फेरि स्यालको हुइयाँ छुट्यो रात बाँकी रै छऽ अझै ।।

साँझ परेसी प्यालासँगै याद पिउँथेँ मात्ने गरी
भुल्छु भन्दा छाती दुख्यो रात बाँकी रै छऽ अझै

मर्नु बाँच्ने दोसाँधमा राख्नु उसको धर्मै थियो ।
माकुरीले जाली बुन्यो रात बाँकी रै छऽ अझै ।।

जिन्दगी मै गन्तब्यहीन लक्ष्यगामी यात्री थिएँ ।
आजकै बास छिट्टै उठ्यो रात बाँकी रै छऽ अझै ।।
14/07/2011

गजलः अझै बाँकी थियो

गजलः अझै बाँकी थियो
¤आवाज सर्मा¤

बेहोसीमा एक्लै पिएँ रात अझै बाँकी थियो ।
होस फिर्दा सम्बन्धको मात अझै बाँकी थियो ।

जिन्दगीकै बाटो अलग हुन्छ यही घुम्तीसँगै ।
गर्नु हुन्थ्यो आजै निधो बात अझै बाँकी थियो ।।

अनयासै हूरी चल्यो झर्न पुग्यो फूल कोपिला ।
पालुवाको पर्खाइमा पात अझै बाँकी थियो ।।

खण्डहरको छेउमै पुगी के छ भनी सोध्यौ जहाँ ।
भत्किएका संकल्पको खात अझै बाँकी थियो ।।

कुन्नि के भो आवाजमा बोल्छु भनेँ भक्कानिएँ ।
चस्स दुख्थ्यो बेला बखत घात अझै बाँकी थियो ।।
12/07/2011
बहरे मुजास अखरम
SISS SSIS SIIS SSIS

गजलः पुतलीको माया

गजलः पुतलीको माया
¤आवाज शर्मा¤

पुतलीको बत्तीसितै माया बस्यो कि ?
धरतीमा आकाशको तारा खस्यो कि ?

जोसुकैले जे जे भनून् ख्यालै भएन ।
ढडियामा माछीसरी जीवन फस्यो कि ?

भर पर्दा बिश्वासमा पैरो चल्यो रे ।
मुटु चिर्दै आफन्तले भाला धस्यो कि ?

किन आँखा साउन बनी बर्सिरहे हँ ?
बेदनाको हूरी चली बाढी पस्यो कि ?

नबोलेरै निस्सासियौ ​ आवाज कहाँ छ ?
पिरती नै फाँसी बनी गला कस्यो कि ?
10/07/2011
(बहरे हजज अस्तर अखरम महजुफ)

गजलः गजल भयो

गजलः गजल भयो
¤आवाज शर्मा¤
.
चुपचाप चुपचाप ठूलै दहल फसल भयो ।
भयो मौन हस्तक्षेप निजत्वमा दखल भयो ।।

कतै तर्के बहानामा झुके आँखा कतै कतै।
थियो केही एक अर्कामा अझै चासो अटल भयो ।।

जुर्मुराए रहरहरू बन्द ओँठ भित्रै गुम्से ।
आँखाहरू नजानिदो जुधे नयाँ पहल भयो ।।

गरिब छन् रे शब्दहरू चाहनाका अर्थभन्दा ।
चुपचाप सम्झौता भो हिउँ पग्ल्यो तरल भयो ।।

उसले सोधी भित्र कतै गुञ्जिदैछ सुन्यौ आवाज ?
मैले केवल ओँठ खोलेँ उसले भनी गजल भयो ।।
04/07/2011

गजलः परीजस्तै उनी

गजलः परीजस्तै उनी
¤आवाज शर्मा¤

कुनै मीठो कहानीकी परीजस्तै उनी ।
खडेरीमा सितल दिन्छिन् झरीजस्तै उनी ।।

कलेजीमा सजाएको कुनै तश्विर भरी ।
समर्पणका कथा लेख्छिन् खरीजस्तै उनी ।।

सखारैमा कुनै मीठो सुवास फिँजाउँदै ।
बिहानीकी उषा डाक्छिन् चरी जस्तै उनी ।।

उनी हुन्नन् कतै केही नपुग्दो झै हुने ।
पछ्यौरीमा सजाएको जरीजस्तै उनी ।।

कतै बर्खे खोलीजस्तो समुद्रै झैँ कतै ।
म पो आधी घडाजस्तो भरीजस्तै उनी ।।
30/06/2011

गजलः नभेटिन सक्छ

गजलः नभेटिन सक्छ
¤आवाज शर्मा¤

बह जम्ने मनको खाडल नभेटिन सक्छ ।
वर्षा हुन्छ तर बादल नभेटिन सक्छ ।

हरेक पटक निशानामै तीर चलेको छ ।
भित्री घाउ हो बाहिर घायल नभेटिन सक्छ ।।

हरेक साँझ प्रतिक्षामा नबर्सिनू आँखा ।
सँधै आशु पुछ्ने आँचल नभेटिन सक्छ ।।

म नै रुन्छु तिमी नरोऊ श्रृङ्गार बिग्रिएला ।
त्यो आँखामा मिल्ने गाजल नभेटिन सक्छ ।।

चुँडिएको मन जोड्न सक्छौ भने जोड ।
यति माया गर्ने पागल नभेटिन सक्छ ।।
30/06/2011

गजलः तुलना कहाँ

गजलः तुलना कहाँ ?
¤आवाज शर्मा¤

रुप मञ्जरी फुल कोपिला उनको गरूँ तुलना कहाँ ?
म त चम्किए पनि शीत हूँ जुनको गरूँ तुलना कहाँ ??

रसमाधुरी चुहिहाल्छ झैँ अब ओठको नगरौँ कुरा ।
मरुभूमि नै सितलो हुने गुनको गरूँ तुलना कहाँ ??

रजहाँस झै जब हिड्दछ्यौ म त मुग्ध भै किन सुन्छु हँ ?
बगेको नदी अडियो उहीँ धुनको गरूँ तुलना कहाँ ?

एकतर्फ यो बरसातमा नभको घटा छरपस्ट छ ।
र कपाल यो लहराउँदो कुनको गरूँ तुलना कहाँ ??

के छ राज त्यो ? यति सुन्दरी कसरी भयौ किन बोल्दिनौ ?
मधुरा भए हर रत्न लौ सुनको गरूँ तुलना कहाँ ?

रुप मञ्जरी फुल कोपिला उनको गरूँ तुलना कहाँ ?
म त चम्किए पनि शीत हूँ जुनको गरूँ तुलना कहाँ ??
29/06/2011

गजलः यो राज मसंग

गजलः यो राज मसँग
¤आवाज शर्मा¤

नसोधे भो मौनताको यो राज मसंग ।
म माग्दैछु खोसिएको आवाज मसंग ।।

कतै दीयो बाल्न खोज्दा सम्भावनाको ।
बन्यो आँधी फेरि उस्तै नाराज मसंग ।।

अझै जिउँदो लास जस्तै प्रहार खपूँ कि ?
दुख्यो भन्दा हाँस्छ मेरै रीवाज मसंग ।।

उज्यालै हो हिड्न जाने बाटो सहज छ ।
खबरदारी गर्छ आफ्नै अन्दाज मसंग ।।

समेली यी लाख टुक्रा सम्बेदनाका
यही छाती बन्छु भन्थ्यो कोलाज मसंग ।।

नसोधे भो मौनताको यो राज मसंग ।
म माग्दैछु खोसिएको आवाज मसंग ।।

25/06/2011

गजलः बल्न बाँकी के छ

गजलः जल्न बाँकी के छ ?
¤आवाज शर्मा¤

उम्लिएका आँशु झर्छन् जल्न बाँकी के छ ?
ढुक्ढुकीमै बल्छ आगो बल्न बाँकी के छ ??

पूर्णिमाको जून हो कि रात पग्ली झर्छ ।
साँझ संगै आश ढल्छन् ढल्न बाँकी के छ??

घात धोका चल्छ उस्तै चल्छ खोटो नोट ।
सत्य मात्रै चल्न छाड्यो चल्न बाँकी के छ ??

जिन्दगीमा जे छ आफ्नो फेरि बाजी राख्छु ।
चाल उस्कै दाउ उस्कै छल्न बाँकी के छ??

उम्लिएका आँशु झर्छन् जल्न बाँकी के छ ?
ढुक्ढुकीमै बल्छ आगो बल्न बाँकी के छ ??
05/06/2011

गजलः बल्दा कस्तो मजा आयो

गजलः बल्दा कति मजा आयो
¤आवाज शर्मा¤

अँधेरीमा अहा दीयो बल्दा कस्तो मजा आयो ।
सलेदोलाई सोधेका छौ जल्दा कस्तो मजा आयो ??

बगैचामा पुगेजस्तै उस्तै उस्तै सुवास तिम्रो ।
बतासलाई सोधेका छौ चल्दा कस्तो मजा आयो ??

अनयासै लुकी हेर्दा चोरी पक्ड्यौ म सर्माएँ ।
नजरलाई सोधेका छौ ढल्दा कस्तो मजा आयो ??

सयौँ यस्ता इशारा छन् मैले ढाँटे बुझ्यौ तिम्ले ।
बहानालाई सोधेका छौ छल्दा कस्तो मजा आयो ??

अँधेरीमा अहा दीयो बल्दा कस्तो मजा आयो ।
सलेदोलाई सोधेका छौ जल्दा कस्तो मजा आयो ??
03/06/2011

गजलः लामो यात्रा

गजलः लामो यात्रा
¤आवाज शर्मा¤

लामो यात्रा पाइलै पिच्छे उल्झन भेटेँ मैले ।
आफूभित्रै आफ्नै दुश्मन् त्यो मन भेटेँ मैले ।।

आफ्नो स्वार्थी उत्कण्ठालाई चिन्नै गाह्रो पर्दा ?
आफ्नै घाँटी रेट्ने कैयौँ सज्जन भेटेँ मैले ।।

खुल्ला आकास भित्रै बन्दी भीडमा एक्लो भन्थेँ ।
हेर्दा हेर्दै आफ्नै आँगन् निर्जन भेटेँ मैले ।

साँचो माया सीमा कोरी ब्याख्या गर्ने को हो ?
पश्चातापमा लाखौँ दुःखी जीवन भेटेँ मैले ।।

मेरो हिम्मत मेरो आँटको चर्चा ठूलै हुन्थ्यो ।
तर्सेँ आफै आँखै सामू दर्पन भेटेँ मैले ।।
03/06/2011

गजलः उल्झन भेटेँ मैले

गजलः उल्झन भेटेँ मैले
¤आवाज शर्मा¤

हजार बाटा सबै तिर उल्झन भेटेँ मैले ।
आफैभित्र नअटेको त्यो मन भेटेँ मैले ।।

आफ्नै क्रुर अभिष्टलाई नचिनेर रोजै ।
आफैलाई बली दिने सज्जन भेटेँ मैले ।।

भीड बीच एक्लो हुनु एक्लै एक्लै हाँस्नु ।
आफ्नै आकास आफ्नै लागि कफन भेटेँ मैले ।।

साँचो माया बाँधिएन परिभाषा भित्र
ब्याख्या गर्दै रुँने लाखौँ जीवन भेटेँ मैले ।।

मलाई मेरै आँट माथि ठूलो गौरब थियो ।
कहालिएँ आँखै अघि दर्पन भेटेँ मैले ।।

02/06/2011

गजलः र पो पिउँछु

गजलः र पो पिउँछु
¤आवाज शर्मा¤

प्यालाभरी छाँयासरी हुन्छ्यौ र पो पिउँछु ।
बग्दै नशा हरअंगमा छुन्छ्यौ र पो पिउँछु ।।

बोलाउँदा आँखा तरी भाग्छ्यौ अझै टाढा ।
टोलैभरी हल्ला गरे सुन्छ्यौ र पो पिउँछु ।।

टाढा पराई जस्तो कतै माया नभा जस्तो ।
भैगो भनी घुर्क्याउँदा रुन्छ्यौ र पो पिउँछु ।।

दिन्छ्यौ भनी आशा मलाई जाडो यसै बित्छ ।
बर्षै नयाँ टोपी रुमाल बुन्छ्यौ र पो पिउँछु ।

सातै जुनी साथै बिताऊँ भन्ने सयौँ होलान् ।
सर्माउँदै साथी मलाई चुन्छ्यौ र पो पिउँछु ।।
31/05/2011

गजलः आकास बाँकी छ

गजलः आकास बाँकी छ
¤ आवाज शर्मा ¤

मेरो त धर्ती र आकास बाँकी छ ।
ऊ दीप जल्दैछ उल्लास बाँकी छ ।।

थाहा छ जोबाट आघात भा'को छ ।
होला कि ? त्यै माथि विश्वास बाँकी छ ।।

यो देश हाँसे म बाच्नेछु जो भन्छ ।
उस्कै त गन्तब्य प्रबास बाँकी छ ।।

शंका छ यो दीप निर्धक्क बल्ला र ?
भो फेरि बल्दैन संत्रास बाँकी छ ।।

उठ्ने छ आवाज भत्किन्छ यो रात ।
झुल्किन्छ त्यो सूर्य हो आस बाँकी छ ।।
24/05/2011

गजलः उस्तै छ

गजलः उस्तै छ
¤आवाज शर्मा¤

उस्तै छ यो रीति सँस्कार उस्तै छ ।
उस्तै छ सोचाइ संसार उस्तै छ ।।

आदर्श फोहोर छ विश्वास घायल छ ।
उस्तै छ प्रहार संहार उस्तै छ ।।

फाँसी म चढ्दैछु दोषी छ उन्मुक्त ।
उस्तै छ कानून संभार उस्तै छ ।।

बेचेर मातृत्व पालिन्छ जो भ्रष्ट ।
उस्तै छ प्रशस्ती संचार उस्तै छ ।।

पुग्नै छ गन्तब्य टाढा र आँधी छ ।
उस्तै छ बाटो र संघार उस्तै छ ।।

बहरे हजज मुसम्मन अखरब
छन्दः सारङ
23/05/2011

गजलः रीतिकथाको कुरा

गजलः रीतिकथाका कुरा
¤आवाज शर्मा ¤

भो नसुनाऊ उनै, रीतिकथाको कुरा ।
केबल ढोँगी कुनै, नीतिकथाको कुरा ।।

एक पुरानो कथा बिर्सिसकेको छु जो ।
सुन्नु छ मैले त्यही गीतिकथाको कुरा ।।

फूल उनेको थिएँ साथ कलेजी थियो ।
हुन्न पुरानो कहीँ प्रीतिकथाको कुरा ।।

भाग्य सलेदो बन्यो दीप नबाली बसेँ ।
रै छ अँध्यारो यही स्थितिकथाको कुरा ।।

भो नसुनाऊ उनै, रीतिकथाको कुरा ।
केबल ढोँगी कुनै, नीतिकथाको कुरा ।।
22/05/2011

गजलः सँगै रोयौँ

गजलः सँगै रोयौँ
¤आवाज शर्मा¤

बोकी रहर आकास भरी उड्दा सँगै रोयौ ।
गन्तब्यमा पुग्नै नपाई छुट्दा सँगै रोयौ ।।

बाधा सयौ पन्छाउँदै तर्दै थियौ खोली ।
डुङ्गा छुटी मझधारमा पुग्दा सँगै रोयौ ।।

झम्के झरी जीवन भयो बाढी पस्यो मनमा ।
बग्दा सँगै भिज्दै गयौ डुब्दा सँगै रोयौ ।।

गल्ती थिए हाम्रा कतै दोषी थिए तृष्णा ।
सम्बन्धको धागो छिनी दुख्दा सँगै रोयौ ।।

आकास खुल्यो बादल हट्यो मेरो हिमाल हाँस्यो ।
यस्तै त हो यो जिन्दगी बुझ्दा सँगै रोयौ ।।

22/05/2011

गजलः सिरानी भिज्छ

गजलः सिरानी भिज्छ
¤आवाज शर्मा ¤

सिरानी भिज्छ पोखिन्छे उदासी भित्र ऊ ।
विहानी हुन्छ अग्लिन्छे उचाई भित्र ऊ ।।

जुटाई आश राख्छे ऊ लुकाई तिर्सना ।
निशानी डुब्छ तैरिन्छे सुनामी भित्र ऊ ।।

उठाउँछे शीर तेर्सिन्छन् हजारौँ बाध्यता ।
सुनामी उठ्छ भत्किन्छे तुफानी भित्र ऊ ।।

छ आफ्नै चाह आफै झैँ अचम्मै चञ्चले ।
जवानी चढ्छ तड्पिन्छे कुमारी भित्र ऊ ।।

सिरानी भिज्छ पोखिन्छे उदासी भित्र ऊ ।
विहानी हुन्छ अग्लिन्छे उचाई भित्र ऊ ।।

17/5/2011

गजलः जिन्दगी

गजलः जिन्दगी छ
¤आवाज शर्मा ¤

पौरखीले भन्छ आफ्नै पाखुरीमा जिन्दगी छ ।
तिर्सनामा रङ्ग भर्ने आतुरीमा जिन्दगी छ ।।

सिर्र मीठो चल्छ हावा बिर्सिइन्छन् दुःख सारा
लाग्छ साँच्चै आफ्नु गाउँकै लाकुरीमा जिन्दगी छ ।

फूल फूल्दा आश बोकी फूल्छ भन्थे भ्रमराको ।
चुम्न पाए कोपिलाले माहुरीमा जिन्दगी छ ।।

सम्झनाको ओढनीले प्रीति फुल्ने गाउँ ढाक्दा
फुल्न जाने बल्ल चोखो माधुरीमा जिन्दगी छ ।।

शब्दसंगै गीत बन्ने ढुक्ढुकीको धून आवाज ।
सुन्नु मात्रै पर्छ मेरो बासुरीमा जिन्दगी छ ।।

गजलः के कुरा भो

गजलः के कुरा भो
¤आवाज शर्मा¤

यहाँ घात पियारो छ रहरको के कुरा भो ।
यहाँ पिउनु समुद्रै छ लहरको के कुरा भो ।

न भेटिन्छ कुनै साथ हृदयको घाउ पोल्दा ।
यहाँ गाउँ बिरानो छ शहरको के कुरा भो ।।

उही प्यास अझै बढ्छ छटपटी हुन्छ उस्तै ।
यहाँ फूल बिझाउँछ कहरको के कुरा भो ।।

कठै! भित्र छुरा रै छ सरणमै रै छ धोका ।
यहाँ मृत्यु सुधामैँ छ जहरको के कुरा भो ।।

जहाँ मोति सरी आशु हृदयका धून बन्छन् ।
यहाँ शब्द बुझे पुग्छ बहरको के कुरा भो ।।
10/05/2011

गजलः रुँदैछु म आज

गजलः रुँदैछु म आज
¤आवाज शर्मा¤

आफैलाई टाढा छोडी रुँदैछु म आज ।
रुन्न भन्दै बाचा तोडी रुँदैछु म आज ।।

मौका पर्दा कौडी पनि नछोडूँ झैँ लाग्यो ।
बेमौकामा हिरा फोडी रुँदैछु म आज ।।

उज्यालोले पोल्छ भन्दै बहानामा बाँचे ।
अँध्यारोमा यात्रा मोडी रुँदैछु म आज ।।

फूल मलाई बिझाउँथ्यो कपास साह्रो लाग्थ्यो ।
पछुतोका काँढा गोडी रुँदैछु म आज ।।

हिजो साँझ तिम्रै अघि तिम्रो तश्वीर च्यातेँ ।
तिनै टुक्रा टुक्रा जोडी रुँदैछु म आज ।।
04/05/2011

गजलः उनी थिइन्

गजलः उनी थिइन्
¤आवाज शर्मा¤

बाँधिएथ्यौँ अँगालोमा करेलीमा उनी थिइन् ।
त्यहीँ थियो चोखो माया भरेलीमा उनी थिइन् ।।

गाई बाख्रा चराउँदै सालैजोमा कुरा गर्थ्यौँ ।
चुल्ठो माथि बुकी उन्दा टरेलीमा उनी थिइन् ।।

सँगै गर्थ्यौ लेक बेशी सँगै जान्थ्यौ मेलापात ।
अर्म पर्म सँगै थियो परेलीमा उनी थिइन् ।।

तिर्सना भै मोतिदाना पसिना झै तप्प झर्थे ।
सँगै होस्टे हैँसे गर्थ्यौँ झरेलीमा उनी थिइन् ।।

अझै पनि ताजा पाउँछु झझल्कोमा 'बाला'पन ।
नमेटिने सम्झनाका तरेलीमा उनी थिइन् ।।
24/04/2011

गजलः कहाँ छ ?

गजलः कहाँ छ ?
¤आवाज शर्मा¤

म भन्छु नियम् र बिधान कहाँ छ ?
दवाइ छ अवश्य निदान कहाँ छ ??

न शीर न पाउ कतै छ कि भेउ ?
गर्यौ कि तलास सिरान कहाँ छ ??

नबेच त भन्छु म के छ र बेच्नु ?
छ मात्र शरीर इमान कहाँ छ ??

अगाडि छ जे छ मसान सरी छ ।
र फेरि नसोध चिहान कहाँ छ ??

अझै त छ देश छ सूर्य र चन्द्र ।
हराउन सक्छ निशान कहाँ छ ??
16/04/2011

गजलः गाउँ प्यारो

गजलः गाउँ प्यारो
¤आवाज शर्मा¤

मलाई मेरै गाउँ प्यारो
म जन्मेकै ठाउँ प्यारो

नजर छोपी सुस्त बोली
म हूँ भन्थ्यौ नाउँ प्यारो

नरोऊ भन्थेँ आशुँ झार्दा
पिरो खट्टा पाउँ प्यारो

थियो हाम्रो प्रीत चोखो
लगानीकै साउँ प्यारो

मलाई मेरै गाउँ प्यारो
म जन्मेकै ठाउँ प्यारो

16/04/2011

गजलः आज फेरि पनि

गजलः आज फेरि पनि
¤आवाज शर्मा¤

झझल्कोमा तप्प आँशु खस्यो आज फेरि पनि ।
निस्सासिँदो सम्झनाले कस्यो आज फेरि पनि ।।

जून थियो लाखौँ लाख तारा थिए आकासमा ।
जस्लाई रोजेँ त्यही तारा खस्यो आज फेरि पनि ।।

बल्झिएको घाउ थियो अल्झिएको झिनो आशा ।
त्यही आशा बिषालु भै डस्यो आज फेरि पनि ।।

भुलूँ भन्छु कति कुरा अझै गाढा हुन्छन् किन ।
छातीभित्रै शूल बनी बस्यो आज फेरि पनि ।।

भन्नै पर्ने थिए कति शब्द कहाँ कहाँ दुखे ।
मेरो आवाज भुमरीमा पस्यो आज फेरि पनि ।।
14/04/2011
नयाँ वर्ष-2068

गजलः प्रकाश नखोज

गजलः प्रकाश नखोज
¤आवाज शर्मा¤

डुबेको जूनमा, प्रकाश नखोज ।
म धर्ती दिन्छु भो, आकास नखोज ।।

यो माटो जिन्दगी, आस्था र भविष्य ।
छ आफ्नै आँगनी प्रबास नखोज ।।

लेकाली फूलको माया छ पवित्र ।
फँसिन्छौ नक्कली विश्वास नखोज ।।

सितल् यो ओजिलो छाती छ म संगै ।
बिरानो धूपको संन्त्रास नखोज ।।

जित्यौँ यो युद्धमा सम्हाल्नु छ प्राप्ति
पराजित् बन्नुको आभाष नखोज ।।

बहरे करीब मुसद्दस मख्बून
ISSS ISSS IISS
लयः (3+3)+(3+3)=12
29/03/2011

गजलः ऊ र समय

गजलः ऊ र समय
¤आवाज शर्मा¤

जोसँग छ, आँट उतै, बिजय भेटिन्छ ।
जित्नेकै त, पछिपछि, समय भेटिन्छ ।।

कति बहस्, चलाइए, बिना प्रशंगमा ।
भरिएको, प्यालासँगै, बिषय भेटिन्छ ।।

तिम्ले अर्थ, कहाँ बुझ्यौ, मौन इशाराको ?
उसका हरेक, मौनतामा, निश्चय भेटिन्छ ।।

सिकाएछौ, संस्कार ठूलो , तिमी गरिब हैनौ ।
त्यहाँ हरेक, चालभित्र, विनय भेटिन्छ ।।

हजार चोटि, मरिसकिस्, ए लाचार मान्छे ।
फेरि किन, मर्छु भन्ने, यो भय भेटिन्छ ।।

नलेखेर, पो त उस्ले, लेख्नु मात्र पर्छ ।
शब्दसँगै, आवाजको, यो लय भेटिन्छ ।।

(लयः 4/4/6=14)
28/03/2067

गजलः न सासको कुरा भयो

गजलः न सासको कुरा भयो
¤आवाज शर्मा¤

न सासको कुरा भयो ।
न लासको कुरा भयो ।।

कथा उही छ भोकको ।
न गाँसको कुरा भयो ।।

उधारिँदो छ जिन्दगी ।
न बासको कुरा भयो ।।

नसुल्झिने दशा बढ्यो ।
र त्रासको कुरा भयो ।।

छ शान्ति खै कहाँ कता ।
तलासको कुरा भयो ।।

जताततै सँधैभरी ।
निरासको कुरा भयो ।।

न क्यै रह्यो रहस्यमा ।
न आसको कुरा भयो ।।

27/03/2067

गजलः किनारमा पाएँ आज

गजलः किनारमा पाएँ आज
¤आवाज शर्मा¤

मझधारमा हराएथेँ किनारमा पाएँ आज ।
टप्प टिप्यौ शीरमा लायौ श्रृँगारमा पाएँ आज ।।

आफ्नो भन्नु अरू को छ? तिम्ले बुझ्यौ मैले बुझेँ ।
सारा कसम फिका भए निधारमा पाएँ आज ।।

भन्थ्यो कोही जिउन जाने प्याला भित्रै शान्ति मिल्छ ।
बजारिया शान्ति खोज्दा तरवारमा पाएँ आज ।।

कस्तुरीले वास खोज्दै सारा बन चहारेछ ।
हराएको देश आफ्नै दरवारमा पाएँ आज ।।

मनै मन बाट कुनै 'आवाज' आयो स्विकृतिको ।।
बल्ल आज जिन्दगीको आधारमा पाएँ आज ।।
26/03/2067

गजलः साइँला

गजलः साइँला
¤आवाज शर्मा¤

मनैमन गुनम् साइँला दुइटा मुटु उनम् साइँला ।
जुनी जुनी नछुटिनी मायापिरिम् बुनम् साइँला ।।

जोवन यसै जाने हो कि पराई आई लाने हो कि ।
मनको आँधी बाँध बाँधी कैलेसम्म थुनम् साइँला ??

हाँसे माया गाँसी भन्छन् बोले पोथी बासी भन्छन् ।
गाउँभरिका नौथरीका कति कुरा सुनम् साइँला ??

ब्रत बसी मागम् जस्तो हात समाई भागम् जस्तो ।
मेरो लायक तिमी बाहेक अरू कल्लाई चुनम् साइँला ??
21/03/2011

गजलः सरक्कै सर्की

गजलः सरक्कै सर्की
¤आवाज शर्मा¤

बदल्दै चाला सरक्क सर्की ।
इशारा गर्थी लरक्कै लर्की ।।

नचिन्ने जस्तै बहाना पारी ।
बोलाएँ मैले तरक्कै तर्की ।।

नभाका चर्चा चलायो कल्ले ।
नबोल्दै केही जरक्कै जर्की ।।

मनै हो आखिर दुखाए दुख्छ ।
सिसाको झ्यालझै चरक्क चर्की ।।

म आफ्नै बाटो नबोली फर्केँ ।
रुँला झै गर्दै दरक्कै दर्की ।।

बिहानी आकास खुले झै हाँसी ।
जित्यौ भो भन्दै फरक्क फर्की ।।


20/03/2011

गजलः चर्किनदेऊ

गजलः चर्किनदेऊ
¤आवाज शर्मा¤

सीसा जस्तै त हो माया चर्किनेलाई चर्किनदेऊ ।
पोल्यो भन्दा अझै बारुद छर्किनेलाई छर्किनदेऊ ।।

ठिक्कै पर्छन् बरा भन्छन् आँशु पुछ्ने हुन्न कुनै ।
खोजे कैयौँ बहाना छन् तर्किनेलाई तर्किनदेऊ ।।

साखुल्ले भै छुरा घोच्ने भन्छ साँचो मित्र म हूँ ।
पर्दा खोल्दा खुराफाती झर्किनेलाई झर्किनदेऊ ।।

आफ्ना आफ्नै कुरा हुन्छन् पुग्नुपर्ने लक्ष्य कहाँ ।
आधी बाटो छँदै कोही फर्किनेलाई फर्किनदेऊ ।।

काँढा टेक्दै हरेक पाइला हिँड्नु मैले पर्छ जसै ।
सँगै यात्रा गरौँ भन्दै पर्खिनेलाई पर्खिनदेऊ ।।
20/03/2011

गजलः हररात सपनीमा

गजलः हररात सपनी
¤ आवाज शर्मा¤

हररात सपनीमा आउँछ्यौ र रुवाउँछ्यौ ।
बर्सिरन्छन् मोतिदाना तिमी त्यहीँ नुहाउँछ्यौ ।।

फकाउँछ्यौ फुल्याउँछ्यौ मोहनीले झुलाउँछ्यौ ।
जुनी जुनी नछुटिने बाचाकसम खुवाउँछ्यौ ।।

नभेटिने आकास हुन्छ नमेटिने तृष्णा अझै ।
गुलाफको फूल देखाई चस्स काँढा छुवाउँछ्यौ ।।

ब्युँझिएर खोज्छु कतै अनयासै हराउँछ्यौ ।
थाहै पाइनँ कहाँ लुकाऊँ तिमी कहाँ सुहाउँछ्यौ ।।

16/03/2011

गजलः जरीना

गजलः जरीना
¤ आवाज शर्मा¤

मेरो पुराण जस्तै हो तिम्रो नमाज जरीना ।
मेरो संस्कार जस्तै हो तिम्रो रिवाज जरीना ।।

पन्क्षी कमजोर भएमा मात्रै बाँधिने हैन र ?
मेरो पिञ्जडा जस्तै हो तिम्रो समाज जरीना ।।

खोजे भेटिन्छन् प्रशस्तै मेरा ढुक्ढुकी पत्रमा ।
मेरो हृदय जस्तै हो तिम्रो दराज जरीना ।।

कस्ले छुटाउन सक्ला र ? मृत्यु हार्छ रे प्रेममा ।
मेरो आशंका जस्तै हो तिम्रो अन्दाज जरीना ।।

हरेक लडाइँ जित्छु म मात्र तिमीले बोल्नुछ ।
मेरो तरवार जस्तै हो तिम्रो 'आवाज' जरीना ।।

16/03/2011

गजलः साइँला

गजलः साइँला
¤ आवाज शर्मा¤

पाखाभरि बुकी फुल्यो आँखामा बैँस झल्क्यो साइँला ।
राम्री भन्छ जिस्किरन्छ ऐना यतै पल्क्यो साइँला ।।

कोपिलामा रंग चढ्यो, रहर अंग अंग चढ्यो ।
पातभरि सीतसरी लाली ओँठ टल्क्यो साइँला ।।

पछ्यौरीमा समेटिने चाहना छन् नमेटिने ।
दुनियाँका पापी आँखा उतै मन ढल्क्यो साइँला ।।

आफै गाउँछु, आफै सुन्छु, एक्लै हाँस्छु, एक्लै रुन्छु ।
कस्तो साह्रो भन्नै गाह्रो के बिमारी सल्क्यो साइँला ।।

मनमा तिम्रै छाँया बस्यो थाहै नपाई माया बस्यो ।
जानाजानी लुकाउँदा नि गहबाट छल्क्यो साइँला ।।

14/03/2011

गजलः काली नभन

गजलः काली नभन
¤ आवाज शर्मा¤

तिम्रै खुशी मेरो भेना साली भन काली नभन ।
रिसाऊ बरू गाली गर जाली भन काली नभन ।।

कोइली जस्तै रुपरंग बोल्ने ढंग मन परायौ ।
तिम्रो माया फुल्छ जहाँ डाली भन काली नभन ।।

साथ दिन्छु दुःख पर्दा आँशु झर्दा पुछिदिन्छु म ।
आफ्नै घरमा जोडिएको पाली भन काली नभन ।।

दिदीले नि डाह गर्छे आँखा तर्छे नआ भनेर ।
के भनूँ र रित्तै छु म खाली भन काली नभन ।।

असिनाले चुट्ने हो कि लुट्ने हो कि पराइ आएर ।
लहलह मुसीरको बाली भन काली नभन ।।
14/03/2011

गजलः मेरी जमुना

गजलः मेरी जमुना
¤आवाज शर्मा¤

नजरमै जादुटुना मेरी जमुना ।
पिरतीकी चोखो मुना मेरी जमुना ।।

कति माया गर्छौ भनी किन सोधेकी ?
आफैभन्दा हजार गुना मेरी जमुना ।।

परी बनी आउँछ्यौ मेरो नीँद उडाउँछ्यौ
मेरी साँझ मेरी जुना मेरी जमुना ।।

पूजा गरी राख भन्छ्यौ दीयो बालेर ।
कलेजीको छेउकुना मेरी जमुना ।।

गजलः चुरामा रमाएँ

गजलः चुरामा रमाएँ
¤ आवाज शर्मा¤

सबेरै बजेका चुरामा रमाएँ
इशारा गरेका कुरामा रमाएँ

कलेजी चिरे ती बदामी नयनले
म तीखा नजरको छुरामा रमाएँ

नबोली बुझायौ अनेकौ रहस्य
झुमायौ कुराका जुरामा रमाएँ

अधरमै छ प्याला नसुक्ने नदी झै
पियायौ बिहोसी सुरामा रमाएँ

14/03/2011
जुरा = चुचुरो, गजुर, सिउर

गजलः पिएँ आज फेरिपनि

गजलः पिएँ आज फेरि पनि
¤ आवाज शर्मा¤

दुख्दैथियो घाउ कतै पिएँ आज फेरिपनि
डुब्दैथियो नाउ कतै पिएँ आज फेरिपनि

भन्नलाई त जितेको छु भन्नैपर्र्यो भनिदिएँ
चुक्दैथियो दाउ कतै पिएँ आज फेरिपनि

नभेटिने गन्तब्यको यात्रा सुरू गर्नुथियो ।
छुट्दैथियो पाउ कतै पिएँ आज फेरिपनि ।।

तौलिएर मेरो माया लिलामीको बजारमा
उठ्दैथियो भाउ कतै पिएँ आज फेरिपनि

06/03/2011

गजलः थिएँ र पो पिएँ

गजलः थिएँ र पो पिएँ
¤ आवाज शर्मा¤

तिमीभन्दा धेरै टाढा थिएँ र पो पिएँ ।
उही उदास प्यासी डाँडा थिएँ र पो पिएँ ।।

फूल झरेको रित्तो डाली जस्तै रै छु म त ।
बिषालु म रुखो काँढा थिएँ र पो पिएँ ।।

बाडुलीले झस्काइरह्यो नीँदै लाग्ने हैन ।
तिम्रो मनमा उस्तै गाढा थिएँ र पो पिएँ ।।

अनयासै पाइला बढे जहाँ मृत्यु थियो ।
मतिभ्रष्ट जब्बरसाँढा थिएँ र पो पिएँ ।।

तिमी मनमै कैद भयौ नजर अन्तै डुले ।
निर्लज्ज म गतिछाडा थिएँ र पो पिएँ ।।

06/03/2011

गजलः बिचार उस्तै

गजलः बिचार उस्तै
¤ आवाज शर्मा¤

तिम्रो चाहना उस्तै मेरो बिचार उस्तै ।
तिम्रो जवानी उस्तै मेरो निखार उस्तै ।।

काल, लगन, ग्रह, दशा अनिष्ट छन् रे !
तिम्रो ज्योतिषी उस्तै मेरो निधार उस्तै ।।

चर्चा यसै नि चल्छ चल्दा आपत्ती किन ।
तिम्रो सामिप्य उस्तै मेरो श्रृङ्गार उस्तै ।।

निको कहिल्यै हुन्न कुनै दवाइले छुन्न ।
तिम्रो उपचार उस्तै मेरो बिमार उस्तै ।।

म पो हाँसे झैँ रोएँ तिमी रोए झै हाँस्यौ ।
तिम्रो 'आवाज' उस्तै मेरो चित्कार उस्तै ।।
17/02/2011

गजलः बद्लिए फेरि चाहना

गजलः बद्लिए चाहना
¤आवाज शर्मा¤

माधुरी बास फेरियो बद्लिए फेरि चाहना
तिर्सना आज फेरियो बल्झिए फेरि चाहना

फूलमा रङ्ग पोतिँदा रङ्गियो आज जिन्दगी
मञ्जरी पुष्प फेरियो अग्लिए फेरि चाहना

प्रीतिको धुन सम्झिदा बिर्सिएँ जन्म आँगनी
रङ्गिलो मात फेरियो अल्झिए फेरि चाहना

लाजले जम्छु शीत भै बैँसको ताप रापिलो
प्रेमको अर्थ फेरियो पग्लिए फेरि चाहना

हर्षका आँशु बग्दछन् यो खुशी हेर प्राप्तिको
प्रीतिको स्वार्थ फेरियो सँग्लिए फेरि चाहना

गजलः इशारा बुझेनौ

गजलः इशारा बुझेनौ
¤ आवाज शर्मा¤

फुलेका रहरको इशारा बुझेनौ ।
झुमेका भ्रमरको इशारा बुझेनौ ।।

सुनौलो जवानी चढेसी लजाएँ ।
झुकेका नजरको इशारा बुझेनौ ।।

म प्यासी चरी झै तिमी छेउ सुसाएँ ।
खुलेका अधरको इशारा बुझेनौ ।।

बगेका नदीको किनारा पछ्यायौ ।
दुखेका बगरको इशारा बुझेनौ ।।

म एक्ली बिरानी तमासा भएछु ।
छुटेका सफरको इशारा बुझेनौ ।।

12/02/2011

गजलः पिउँदा पिउँदै

गजलः पिउँदा पिउँदै
¤ आवाज शर्मा¤

यसरी म पिउन पाऊँ साँझ ढलोस् पिउँदा पिउँदै ।
शरीर यही सडक गल्ली माझ ढलोस पिउँदा पिउँदै ।।

आफैभन्दा बलिया छन् गुम्सिएका चाहहरू ।
चिच्याएर बोल्न सकूँ लाज ढलोस् पिउँदा पिउँदै ।।

सीमाहरू समाजका भत्केका छन् लुकिचोरी ।
रहस्यका पर्दा खुलुन् राज ढलोस् पिउँदा पिउँदै ।।

जात, धर्म, पेशा, औकात हाम्रो बिचका सीमाहरू ।
त्यो पाखण्डी अभिमानको ताज ढलोस् पिउँदा पिउँदै ।।

मन्द हुँदै जाओस् 'आवाज' धिप्प बत्ती निभोस् कतै ।
मधुशाला भित्रै जीवन आज ढलोस् पिउँदा पिउँदै ।।

10/02/2011

गजलः कि अरू क्यै हो ?

गजलः कि अरू क्यै हो ?
¤आवाज शर्मा¤

ऊ नै तिम्रो सपनाको राजा हो कि अरू क्यै हो ?
भन्नलाई त आफ्नै भन्थ्यौ साझा हो कि अरू क्यै हो ??

पोहोर भेट्दा अर्कै थियो अहिले फेरि अर्कै रै छ ।
रुचाउँदिन बासी भन्थ्यौ ताजा हो कि अरु क्यै हो ??

उमेरमै हो बज्ने भन्दै मादलसरी बज्यौ अरे ।
भित्तातिर झुण्ड्याइएको बाजा हो कि अरू क्यै हो ??

पाक्कपुक्क मोटाइहाल्यौ उस्को संगत फाप्यो क्यारे ।
पटुकीमा पोको पार्‍या खाजा हो कि अरू क्यै हो ??

09/02/2011

गजलः अलिकति पिउन देऊ

गजलः अलिकति पिउन देऊ
¤आवाज शर्मा¤

आज दिन ढलेकोछ अलिकति पिउन देऊ ।
साँझ बत्ती बलेकोछ अलिकति पिउन देऊ ।।

सिँगै जीवन थोरै भयो पर्खिएर बसूँ कति ?
आउने बेला टलेको छ अलिकति पिउन देऊ ।।

गालाबाट झर्दै रै छन् ताता ताता आशुहरू ।
भित्रै कहीँ जलेको छ अलिकति पिउन देऊ ।।

कतै आगो सल्केको छ सुकेको छ हृदय यो ।
मनमा हूरी चलेको छ अलिकति पिउन देऊ ।।

स्वप्नमै त बाँच्नु छ नि बेहोसी हो जीवन सुख ।
आशा त्यसै गलेको छ अलिकति पिउन देऊ ।।

बदला त लिनै थियो जस्ले मेरो तक्दिर लेख्यो ।
फेरि उस्लेइ छलेको छ अलिकति पिउन देऊ ।।

08/02/2011

गजलः ऊ को होलिन् ?

गजलः ऊ को होलिन् ?
¤आवाज शर्मा¤

ऊ को होलिन् नजरको तीर मेरो मुटुभरी दागिन् ।
सपनीमा मिलनका बाचा गरी बिपनीमा भागिन् ।।

फूलै फूलको सुवासमा जून ताराकी रानी खुल्न थालिन् ।
धर्ती आकास जसोगरी सँधैभरी मेरो साथ मागिन् ।।

परेलीमा चुमिन् जब अनयासै खुले मेरा आँखा ।
निदाउँन चाहेँ फेरि झझल्कोमा उनी मात्रै जागिन् ।।

उनैलाई पाएदेखि सँधैभरी निदाउन राजी ।
नजीक नजीक बोलाएर आफू अझ पर पर लागिन् ।।

गजलः दीयो जलिसकेपछि

गजलः दीयो जलिसकेपछि
¤ आवाज शर्मा¤

अँध्यारै छ फेरि पनि दीयो जलिसकेपछि ।
उडाएछ मेरो प्रकाश हुरी चलिसकेपछि ।।

पूरै दिन यसै बित्यो झुल्के घामको पर्खाइमा ।
बल्ल मेरो आकास खुल्यो साँझ ढलिसकेपछि ।।

प्रतिक्षामा कैयौँ युग एक्लै एक्लै रोइरहेँ ।
कोही आयो आशु पुछ्न चिता जलिसकेपछि ।।

पटकपटक तोडिएर जुट्छु भन्नु गाह्रो रै छ ।
फेरि उही साथ माग्यौ विश्वास गलिसकेपछि ।।

भित्र भित्रै निस्सासियो अव्यक्त यो मनको आवाज ।
थाहा पाएँ आँखाभरि मोति फलिसकेपछि ।।

07/02/2011

गजलः जून चुहेको बेला

गजलः जून चुहेको बेला
¤ आवाज शर्मा¤

मेरो आकास च्यातिएर जुन चुहेको बेला थियो ।
मेरो आशु साटिएर खुन चुहेको बेला थियो ।।

उपयोग हुँदैथिएँ उपभोग्य वस्तुसरी ।
मेरो आस्था मेटिएर गुन चुहेको बेला थियो ।।

मैले गाउने सरगम रुन्थ्यो हरेक गजलसित ।
मेरो टुङ्ना रेटिएर धुन चुहेको बेला थियो ।।

उपहारमा तौलिएर प्रित जोख्ने महफिलमा ।
मेरो धड्कन पेलिएर सुन चुहेको बेला थियो ।।

दबाइएको आवाज जब उन्मुक्तिको युद्ध रोज्थ्यो ।
मेरो विश्वास बेचिएर नुन चुहेको बेला थियो ।।

06/02/2011

गजलः निभेको दीयो

गजलः निभेको दीयो
¤ आवाज शर्मा¤

निभिसक्यो दीयो अब तेल थप्नु किन ?
हारिसके पछि फेरि खेल थप्नु किन ??

जिन्दगी नै हरेक अर्थ कैदसरी भए ,
घाउ बल्झाइ सम्झनाको नेल थप्नु किन ??

आफैलाई ढाँटेकोछ आफ्नै नियतीले ।
त्यसैमाथि फेरि अर्को झेल थप्नु किन ??

थाहा छैन कहाँ पुग्ने कहा पुगिएछ ?
मझधारमा फँसेकैलाई भेल थप्नु किन ??

चाहनाका 'आवाज'हरू भित्रै गुम्सेका छन् ।
आफ्नै मन फाँसी भए जेल थप्नु किन ??

03/02/2011

गजलः दुई खोलीको दोभान

गजलः दुई खोलीको दोभान
¤ आवाज शर्मा¤

दुई खोलीको दोभानसरी हुनै सकिनँ ।
मन खोलेर रूँ भन्दा नि रुनै सकिनँ ।।

चखेवाका रहरहरू आकास पुगे रे ।
मैले जून टिप्न खोजेँ छुनै सकिनँ ।।

खोसिएको गाँसजस्तै मेरो कहानी ।
आँशुले मन धुन्छु भनेँ धुनै सकिनँ ।।

आँखै भरि मादी सेती एउटै जिन्दगी ।
मेरो आकास पग्ली झर्यो थुन्नै सकिनँ
।।
03/02/2011

गजलः मेरी प्रिया

गजलः मेरी प्रिया
¤आवाज शर्मा¤

परेलीमा सजाएको रहर जस्ती मेरी प्रिया
जुनेली भै लजाएको प्रहर जस्ती मेरी प्रिया

कुनै जादू चमत्कार झैँ जता हेर्र्यो उतै राम्री
परी आई बसाएको शहर जस्ती मेरी प्रिया

अझै दुख्न रहरलाग्ने दुखै जाती भनूँजस्तो
खुशीराजी रुचाएको कहर जस्ती मेरी प्रिया

रिसाउँछ्यौ झन् नजिक आउँछ्यौ खुशी पार्दा कसो होला
सुधा बन्दै रसाएको जहर जस्तै मेरी प्रिया

मेरा सप्ना भरी आउँछ्यौ निधार चुम्छ्यौ हराइहाल्छ्यौ
समुन्द्रमै हराएको लहर जस्तै मेरी प्रिया

28/01/2011

गजलः कोही याद आयो

गजलः कोही याद आयो
¤ आवाज शर्मा¤

जे बिर्सन्छु भन्थेँ सोही याद आयो ।
दुख्यो चस्स छाती कोही याद आयो ।।

छुटेकोछ माया टुटेकोछ आशा ।
म हाँसेछु ब्यर्थै रोई याद आयो ।।

डुबेकोछु आधा बढेकोछ बाढी ।
अँधेरो छ गल्छी गोही याद आयो ।।

तिमी छौ र तिम्रो छ यो चोट ताजा ।
पखालिन्न पीडा धोई याद आयो ।।

मरेकै म हूँ या कुनै भ्रम त्यस्तो
कुनै स्वप्न हो यो छोई याद आयो ।।

27/01/2011

गजलः मजा मान्यौ

गजलः मजा मान्यौ
¤आवाज शर्मा¤

सडकमा डाक्यौ अनि पछारेर मजा मान्यौ ।
वाह वाह उचाल्यौ र थचारेर मजा मान्यौ ।।

तिम्रा झुटा बहाना ती पत्याउँदा नाङ्गो भएँ ।
लाज राख्ने कुनै बाटो नछाडेर मजा मान्यौ ।।

जानाजानी बुनिएका तिम्रा शब्द जालहरू ।
चक्रब्यूह तयार पारी पसालेर मजा मान्यौ ।।

के बिग्र्यो र भनिदियौ खस्नै लागेँ आऊ बचाऊ ।
भीरै छेउ बोलायौ र घचाडेर मजा मान्यौ ।।

टोल छिमेक पँधेरामा मेरै चर्चा हुँदो रै छ ।
दुनियाको नजरबाट खसालेर मजा मान्यौ ।।
23/01/2011

गजलः दुःखिर'ने घाउ तिमी

गजलः दुःखिर'ने घाउ तिमी
¤आवाज शर्मा¤

मुटुभित्र चस्स चस्स दुःखिर'ने घाउ तिमी
मझधारमा पु-याएर डुबाउने नाउ तिमी

भो सम्झिने मनै छैन किन आउँछौ सपनीमा
मेरो औकात भन्दा ठूलो बजारको भाउ तिमी

बेचिएर आफैसित रमाउँने मृगतृष्णा
जीन्दगी नै जुवा भयो हराउने दाउ तिमी

भूल रै छ मारुनीको छमछमीमा धून सुनेँ ।
पाउजु झै बजिरहेँ कलाकारी पाउ तिमी ।।

21/01/2011

गजलः मझेरीमा तिमी

गजलः मझेरीमा तिमी
¤आवाज शर्मा¤

धेरै टाढा गरेँ खोजी मझेरीमा तिमी हुन्थ्यौ
जवानीकै झरी बर्खा खडेरीमा तिमी हुन्थ्यौ

थिएँ सुख्खा खडेरीको कुनै प्यासी चराजस्तै
नजीकैको कुवा धारा पँधेरीमा तिमी हुन्थ्यौ

हजुरमाका कहानीका चराजस्तै उडूँ लाग्थ्यो
म लोभिन्थेँ भँगेरा झैँ भँगेरीमा तिमी हुन्थ्यौ

जहाँ जाऊँ झझल्कोमा तिमी हुन्थ्यौ सदा साथी
जुनेलीमा थियौ उस्तै अँधेरीमा तिमी हुन्थ्यौ

परीजस्तै उडी आउँथ्यौ म तन्द्रामैँ खुशी हुन्थेँ
बुकी फुल्ने तिनै पाखा पखेरीमा तिमी हुन्थ्यौ

20/01/2011

गजलः जिन्दगीमा

गजलः जिन्दगीमा
¤आवाज शर्मा¤

अञ्जुलीमा आँशु थापी गीत गाएँ जिन्दगीको
लालिमाको आश राखी प्रीत लाएँ जिन्दगीको

अनयासै आश टुट्दा घाइते भो पुष्पडाली
कोपिलामै झर्नुपर्ने शीत खाएँ जिन्दगीको

बाँध बाँधी रोकिदैनन् तिर्सनाका भेलबाढी
आँशुहाँसो रै छ जीवन रीत चाहेँ जिन्दगीको

पौरखीले बुझ्नुपर्ने रै छ आफ्नै श्रम के हो
बल्ल आफ्नै पाखुरी भै मीत आएँ जिन्दगीको

लेखिएको भाग्य भन्दै छेकिएथ्यो मूलबाटो
कर्म रोजी मुक्ति खोज्दा जीत पाएँ जिन्दगीको

20/01/2011

गजलः मदहोसी

गजलः मदहोसी
¤आवाज शर्मा¤


दुबै (पालैपालो):
अझै झुम्न चाहन्छु म यति चाँडै नजगाऊ ।
तिम्रै नजर नशालु छन् भो मदिरा नमगाऊ ।।

महिलाः
मदहोस छु म अझै लडेकी हूँ जानाजानी ।
सम्हालिनै चाहन्न म लड्न देऊ नसघाऊ ।।

पुरुषः
बगैँचाका फूल पनि झुक्किएका हुनसक्छन् ।
भमरा त झुक्किन्छन् नै झुम्नदेऊ नभगाऊ ।।

महिलाः
नमेटिने प्यास तिमी नरित्तिने प्याला हूँ म ।
भोक जगाऊ तिर्खा बढाऊ अझै पिऊ नअघाऊ ।।

पुरुषः
ऐना झुटो बोल्न सक्छ मेरा नजर हेर बरू ।
सुहाउँदैन चुल्ठोमाथि जाई जुई नलगाऊ ।।

दुबै (सँगै):
अझै झुम्न चाहन्छु म यति चाँडै नजगाऊ ।
तिम्रै नजर नशालु छन् भो मदिरा नमगाऊ ।।
17/01/2011

गजलः परदेश

गजलः परदेश
¤ आवाज शर्मा¤

म शेष भित्रकै अवशेषमा छु ।
म क्लेश भित्रकै , परिवेशमा छु ।

न सक्छु मनको बहमा म हाँस्न
म ठेश भित्रकै नि हरेशमा छु ।

भए म सतकौँ हतियार तिम्रै
म चेश भित्रकै पनि रेशमा छु ।

म माथि अझ झन् छ अन्याय चर्को
म द्वेश भित्रकै त मधेशमा छु ।

सकेँ न बाँधिन, मनको सिमामा ।
म देश भित्रकै, परदेशमा छु ।

15/01/2011

गजलः तिमी रुन्छ्यौ जब

गजलः तिमी रुन्छ्यौ जब
¤ आवाज शर्मा¤

छियाछिया मुटु हुन्छ तिमी रुन्छ्यौ जब ।
सम्हालिन्छु खुशी हुन्छु तिमी हुन्छ्यौ जब ।।

म हूँ गृष्म खडेरीको कुनै सुक्खा डाली।
पलाउने आशा जाग्छ तिमी छुन्छ्यौ जब ।।

आँशु बग्छ सुस्केरामा जीवन साटिएर ।
त्यही मीठो गीत बन्छ तिमी सुन्छ्यौ जब ।।

कुनै रङ्ग कुनै सुवास नहोस् जिन्दगीको।
पलाँस पनि मगमगाउँछ तिमी चुन्छ्यौ जब ।।

छिरोलिन्छन् कता कता चाहनाका फूल ।
माला बन्छ जिन्दगानी तिमी उन्छ्यौ जब ।।

10/01/11

गजलः मेरा हरेक रातहरू

गजलः मेरा हरेक रातहरू
¤ आवाज शर्मा¤

सुस्केरामा बितेका छन् मेरा हरेक रातहरू
याद बनी सताउँछन् पलपलका साथहरू

चाहिँदैन मदिराको नशा कुनै प्यालाभरि
गालाभरि तप्प झर्छन थोपा थोपा मातहरू

बिर्सन्छु भो भन्दापनि कहाँ सक्छु बिर्सन र
माया गर्दै गला थिच्ने उनै कोमल हातहरू

सानो झोक्का बतासले लुटिएका आशासँगै
हुरीसँगै बरालिन्छन् चाहनाका पातहरू

बेमौसमी असिनाले झारिएको बाला हूँ म
फिका लाग्छन् हुरी झरी खडेरीका घातहरू

04/01/11

गजलः गोलसिमल सहहरू

गजलः गोलसिमल सहहरू
¤ आवाज शर्मा¤

लेख्छु भन्दा नलेखिने मेरा मनका बहहरू
देख्छुभन्दा नदेखिने ब्यथा जम्ने दहहरू

आफै भन्दा धेरै माथि चाहनाका खुट्किला छन्
टेक्छु भन्दा नटेकिने तिर्सनाका तहहरू

खुशी बग्छ अत्तालिँदै सुरौदीको पानीपानी
थेग्छु भन्दा नथेगिने भावनाका गहहरू

संगालेका रहरहरू मंसीरसँगै छिरोलिन्छन्
छेक्छु भन्दा नछेकिने गोलसिमल सहहरू

अक्षरयात्रा
हुँडीकोट
1/1/11