गजलः साँझ ढलेपछि

गजलः साँझ ढलेपछि
¤आवाज शर्मा¤
॰
निस्सासिँदो हूरी चल्छ साँझ ढलेपछि ।
किस्तावन्दी जीवन ढल्छ साँझ ढलेपछि ।।
॰
दीयो हेर्दै टोलाउँछु बतास बौलाउँछ ।
सलेदो झैँ आशा जल्छ साँझ ढलेपछि ।।
॰
ऐँजेरू झै सम्बन्धका पत्र केलाउँदै ।
बाँझो रहर पाक्छ गल्छ साँझ ढलेपछि ।।
॰
समर्पणको हिसाव गर्छु देख्छु मात्रै
घाटा
आस्था झुक्छ तृष्णा फल्छ साँझ
ढलेपछि ।।
॰
एउटा आगो निभाउन हजार राँका झोस्छु ।
प्याला भित्रै सागर बल्छ साँझ
ढलेपछि ।।
॰
उता बत्ती धिप्प निभ्छ यता आवाज सुक्छ
।
मृत्यु आउँछ ढाँट्छ छल्छ साँझ
ढलेपछि ।।
02/09/2012