गजलः रातभरि
¤आवाज शर्मा¤
॰
यी आँखामा साउने झरी किन होला रातभरि ?
पोल्छ छाती घरी घरी किन होला रातभरि ??
॰
कोल्टे फेर्दै छट्पटिन्छु निद्रा अझै पर भाग्छ ।
ताना चल्छन् नानाथरी किन होला रातभरि ??
॰
उता जोडी बाँधिएर कोइलीले गीत गाउँछ ।
यता एक्लै रुन्छे चरी किन होला रातभरि ??
॰
जहाँ दिउँसै रात पर्छ उज्यालोमै हुचील बास्छ ।
पराइ बन्छन् आफ्नै धरी किन होला रातभरि ??
॰
हेर्दा हेर्दै तारा खस्यो आकास कहाँ रित्तियो र ?
जीवन मृत्यु सरिबरी किन होला रातभरि ??
॰
यौटा आवाज निस्सासिन्छ अर्को आवाज बिलाउँछ ।
सन्नाटा छ वरिपरी किन होला रातभरि ??
05/09/2011
No comments:
Post a Comment