गजलः हुनुपर्थ्यो

गजलः हुनुपर्थ्यो
¤आवाज शर्मा¤
॰
मुखमा लगाम आकांक्षामा अंकुस हुनुपर्थ्यो ।।
या त मेरो बाटो छेक्ने जुलुस हुनुपर्थ्यो ।।
॰
गुलेलीले निशान साँध्छौ ताक्छौ मेरो मुटु ।
छाती खोल्थेँ तिम्रो हातमा कार्तुस हुनुपर्थ्यो ।।
॰
एऽ गलैँचा पो बिच्छाएछौ झुक्कियौ कि कुन्नि ?
मैले टेक्ने पाइलै पिच्छे एम्बुस हुनुपर्थ्यो ।।
॰
हजार ब्रत गर्न परोस, कठोर तपस्या होस् ।
जे माग्यो त्यै दिने दैब कञ्जुस हुनुपर्थ्यो ।।
॰
'बाला' मर्छ, मर्नै पर्छ 'आवाज' कहाँ मर्छ ?
इर्ष्या संगालेर राख्न सन्दुस हुनुपर्थ्यो ।।
23/06/2012‬‬

गजलः सास अड्की रह्यो

गजलः सास कतै अड्की रह्यो
¤आवाज शर्मा¤
॰
हो समय घर्किदैथ्यो सास कतै अड्की रह्यो ।
मुस्कुराई बस्यौ उता, यता मुटु धड्की रह्यो ।।
॰
म भीडको त्यो हिस्सा हूँ सारा संसार सँगै हुन्छ ।
एक्लै थिएँ त्यहीँ कतै तिम्रो साथ खड्की रह्यो ।।
॰
बाहिर हाँस्नु एउटा कुरा आफैलाई ढाट्नु कति
आँखा बर्से सास रुक्यो मन भित्रै मन पड्की रह्यो ।।
॰
तिमी भन्छौ आऊ रमौँ यो बादल, यो बर्खासँगै
म भोग्दैथेँ बिना मौसम मेरो आकाश चड्की रह्यो ।।
॰
हत्केलामा कोरिएका रेखा हेर्दै फकाउँछु ।
आफ्नै भाग्य सम्हालेर राखूँ भन्दा भड्की रह्यो ।।
23/06/2012‬‬

गजलः फेरि अर्कै

गजलः फेरि अर्कै
¤आवाज शर्मा¤

पर्‍यो त्यै कुराको प्रभाव फेरि अर्कै ।
थियो फेरिएको नकाव फेरि अर्कै ।।

हिजै साँझ यौटा कुनै प्रश्न सोधेँ ।
दियौ मौनताले जवाव फेरि अर्कै ।।

नदेख्दा त लाग्थ्यो म संगै छ छायाँ ।
म देख्दैछु घामको लगाव फेरि अर्कै ।।

नशा भित्र बग्ने नशा मैँ छ भट्टी ।
हरेक साँझ भेट्छौ बहाव फेरि अर्कै ।।

म बोलेर थाकेँ जवाव छैन केही ।
नबोली बस्यौ झन् दबाव फेरि अर्कै ।।

खबर के छ 'बाला'? थियो सुस्त आवाज ।
बढ्यो धुक्धुकीमा तनाव फेरि अर्कै ।।
15/06/2012
जन्मदिन

गजलः कोही अचम्म

गजलः कोही अचम्म
¤आवाज शर्मा¤
॰
सँगसँगैको छोडियो कोही अचम्म ।
झन् बिरानो रोजियो कोही अचम्म ।।
॰
शीत पर्दा पातमा टल्क्यो जवानी ।
घामसंगै चोरियो कोही अचम्म
॰
फूलको बास फैलिँदा पाखा पखेरी ।
माहुरी झैँ लोभियो कोही अचम्म ।।
॰
पिंजडा पो रै छ मन् खुल्ला नखुल्ला ।
चूनरीमा छोपियो कोही अचम्म ।।
॰
सिर्सिरेमा के उड्यो मेरो पछ्यौरी ।
रंग बन्दै पोखियो कोही अचम्म ।।
(रमल)
13/06/2012

गजलः फेर्ने हो कि !

गजलः फेर्ने हो कि !
¤आवाज शर्मा¤
॰
हामी जहाँ टेक्छौ उक्त आधार पो फेर्ने हो कि !
सोचाइको यो संकीर्ण संसार पो फेर्ने हो कि !!
॰
चल्दैछ जुन पाखण्डी र आडम्बरी सत्तामोह ।
दोषी भए सिंगै राज्य, सरकार पो फेर्ने हो कि !!
॰
त्यो जङ्गली उस्को न्याय त्यो क्रुरता त्यै आतङ्क ।
लौ मुक्ति भो भन्थ्यो फेरि तरवार पो फेर्ने हो कि !!
॰
निर्लज्ज भै निर्धो लुट्छ भन्दैछ ऊ सेवामा छु ।
राजनीतिको गन्धे रूप व्यापार पो फेर्ने हो कि !!
॰
भत्काउँदै थोत्रो रीति कोर्छौँ युगीन् नौलो चित्र
खाँचो छ यो सोँचको जीर्ण औजार पो फेर्ने हो कि !!
(मुन्सरेह)
12/06/2012

गजलः सम्झनामा कोही छ

गजलः सम्झनामा कोही छ
¤आवाज शर्मा¤
 ॰
 सम्झनामा कोही छ ऊ जिउन एउटा आधार हो ।
भूल होस् या तृष्णा कुनै, लाग्छ साँच्चै यो प्यार हो !
॰
 पर्ख, दीयो बल्दैथियो त्यै निभाई के खोज्दछौ ?
जे निभ्यो त्यो माया थियो देखिएको ब्यापार हो ।
॰
हर कदममा भेटिन्छ घात, पाउ आफ्नै टेक्ने गरौँ
रोप्छ भाला माया गरी, यो अनौठो संसार हो ।
॰
को पराई, आफन्त को ? चिन्नु पर्ने पहिलै थियो ।
यै नजरले धोका दियो मन त आफ्नै गद्दार हो ।।
॰
आत्मघाती यो मौनता तोड्नुपर्थ्यो 'आवाज' खै ?
सुन्छु 'बाला' बोल्दैन रे ऊ अधम हो लाचार हो ।।
(मुतदारिक मुसद्दस मक्तुअ मुदाइफ)
10/06/2012

गजलः भोलिसम्म

गजलः भोलिसम्म
¤आवाज शर्मा¤
॰
केही चिरा पार्छु आज जुट्छौ यसै भोलिसम्म
लुट्थ्यौ हिजो त्यै भनेर लुट्छौ यसै भोलिसम्म
॰
मैले भनेँ, या त छोड, या तोड भो, तड्पिदैछु ।
तिम्ले भन्यौ छाडिदिन्छु टुट्छौ यसै भोलिसम्म ।।
॰
ताराहरू भेट्छु साथ मेरा दुखी पलहरूमा ।
आऊ बसौँ यत्ति रात छुट्छौ यसै भोलिसम्म ।।
॰
वर्षा भई बर्सिँदा त फोका बनी उम्लिँदैछौ ।
उन्माद त्यो क्यै रहन्न फुट्छौ यसै भोलिसम्म ।।

SSIS SISI SSIS SISS
बहरे मुजास मक्फूफ
31/05/2012

गजलः यात्रा जहाँ जहाँ

गजलः यात्रा जहाँ जहाँ
¤आवाज शर्मा¤
॰
यात्रा जहाँ जहाँ पुगोस् बल्झाउने म जाल हूँ ।।
त्यो दाउमा छ जिन्दगी हार्ने उही कुचाल हूँ ।
॰
आँखा भदौ बनाउँदै बोल्छन् कथा अतीतका ।
मायालु भै रुवाउने उस्कै चिनो रुमाल हूँ ।।
॰
राखेर मन् लिलाममा किन्दैछु यी गजलहरू ।
आरोप सबै सही थिए मऽ शब्दको दलाल हूँ ।।
॰
तिम्रा सयौँ गुनासोका मैले दिऊँ जवाफ के ?
जे जे गरूँ नसुल्झिने आफै म एक सवाल हूँ ।।
॰
आवाज हूँ दबाउँदा, रोक्दा कहाँ दबिन्छु र ?
आफै जली जलाउने बिद्रोहको मशाल हूँ ।।

SSIS ISIS SSIS ISIS
रमल मुसम्मन मख्बून
28/05/2012

गजलः कहाँ होला

गजलः कहाँ होला ?
¤आवाज शर्मा¤
॰
आफ्नै मन भन्दा ठूलो खूनी सैतान कहाँ होला ?
म खोज्दैछु त्यही मन चिन्ने विद्वान कहाँ होला ??
॰
साह्रै रीस उठेको छ भेटे देखि झाँको झार्थेँ ।
असमान भाग्य लेख्ने भावी बैमान कहाँ होला ?
॰
बाटो उस्तै घुम्ती हो कि मेरो भाग्य घुमेको हो ?
लक्ष्य देख्छु अल्मलिन्छु म झै अञ्जान कहाँ होला ?
॰
तिमी भन्छौ सजिलै छ, एउटा स्वप्न टुटेपनि ।
फेरि अर्को सजाउन किन्ने दोकान कहाँ होला ??
॰
पराइले छल गरेमा सयौँ बाटा जोगिनैलाई ।
आफैसँग बच्न सकोस् त्यस्तो महान कहाँ होला ??
24/05/2012

गजलः किन होला ?

गजलः किन होला ?
¤आवाज शर्मा¤
॰
बोल्न पा'को छैन अझै मनले खा'को किन होला ?
जति बिर्सूँ भन्छु उस्कै याद आ'को किन होला ??
॰
नजिक जाऊँ तर्किहाल्छे, बोल्न खोज्यो झर्किहाल्छे ।
नदेखे सास फेर्नै गाह्रो यस्तो भा'को किन होला ??
॰
आफ्ना गाई गोठमैँ छन् बाख्रापाठा चोटामैँ छन् ।
बिनासित्ती लुकी लुकी बेँसी धा'को किन होला ??
॰
बाटो ढुकूँ ढुकूँ लाग्ने. देखे लुकूँ लुकूँ लाग्ने ।
क्यै इशारा हो कि त झैँ पात बजा'को किन होला ??
॰
सुरै छाडे सरी हिड्छु, बिना बित्थै छटपटिन्छु ।
'बाला' मनै दोमन हुने, के बिमारी ला'को होला ??
19/05/2012

गजलः खण्डहर नयाँ नयाँ

गजलः खण्डहर नयाँ नयाँ
¤आवाज शर्मा¤
॰
भेट्छौँ जहाँ विवेकका यी खण्डहर नयाँ नयाँ ।
बन्छन् त्यहीँ अमानवी ठूला शहर नयाँ नयाँ ।।
॰
पासै न हो, र माकुरी बुन्दैछ जाल फँसाउन ।
ऊ माहुरी फँस्यो बरै पाल्दै रहर नयाँ नयाँ ।।
॰
देख्दैछु त्यो, तिमी, म, ऊ, हामी सबै जहीँतहीँ ।
तृष्णा छ यो अचम्मको पिउँछौँ जहर नयाँ नयाँ ।।
॰
देखिन्छ जे अगाडि नै, भेटिन्न त्यो यथार्थमा ।
हामी सबै रहस्यका हौँ अंश-हर नयाँ नयाँ ।।
॰
आवाज धरी कहालिँदो, हूचील सँधै कराउँछ ।
भोग्नै छ झन, अझै अनेक काला प्रहर नयाँ नयाँ ।।

SSIS ISIS SSIS ISIS
बहरः रजज मुसम्मन मख्बून
19/05/2012

गजलः यो गरूँला त्यो गरूँला

गजलः यो गरूँला
¤आवाज शर्मा¤
॰
यो गरूँला त्यो गरूँला स्वप्न ठूला ठूला थिए ।
आज चित्ता माथि बस्दा ती दुबै हात खुला थिए ।।
॰
हो, कसैको आश टुट्यो र कसैको गास छुट्यो ।
यता चित्ता जल्दै गर्दा उता चिसा चुला थिए ।।
॰
हिजोसम्म दुनियाँको सामू झुक्दै बाच्नुपर्थ्यो ।
आज ऊ नै माथि थियो अरू भैँका धुला थिए ।।
॰
उस्ले जित्यो मृत्युलाई अब मर्नु पर्दैन ऊ ।
ऊ शान्त र स्थिर थियो अरूका पाउ लुला थिए ।
12/05/2012

गजलः जयगान

गजलः कुरा होस् न !
¤आवाज शर्मा¤
॰
जयगान उस्कै थियो चाहे हातमा छुरा होस् न !
त्यो जुंगाको कदर हुन्थ्यो बोलेपछि पुरा होस् न !!
॰
खडेरीको बालुवामा व्यर्थै पानी राखिएछ ।
पसिनाले पाउँथ्यो न्याय मानो रोपी मुरा होस् न !!
॰
निर्लज्ज भै किन गरूँ तारिफ नग्न शरीरको ?
फेशन आफ्नै साडी, चोलो, पोते, टीका, चुरा होस न !!
॰
बासी पुराण जस्ता लाग्छन् पिरतीका कथाहरू।
कैल्यै पनि नसुनेको नभनेको कुरा होस् न !!
॰
तिमी भन्छौ क्यै बोलेन, यो मौनता कैले सम्म ?
खुल्थ्यो आवाज, नरित्तिने प्यालाभरि सुरा होस् न !
15/05/2012

गजलः र ऊ मर्‍यो

गजलः र ऊ मर्‍यो
¤आवाज शर्मा¤
॰
सबै भन्थे केही पियो र ऊ मर्‍यो ।
म बुझ्थेँ ऊ भोकै थियो र ऊ मर्‍यो ।।
॰
सहेकै हो छाती भरी अभाव त ।
गढ्यो आशै छेड्ने सियो र ऊ मर्‍यो ।।
॰
भुले तिनले ऊबाट जो उज्यालिए ।
सलेदो भै बाल्यो दियो र ऊ मर्‍यो ।।
॰
लडे जित्छौँ हर युद्धमा रहर छरे ।
त्यही भ्रान्ती फल पर्खियो र ऊ मर्‍यो।
॰
गरीबीले आवाज दब्यो र तड्पियो ।
सँधै यस्तै मर्दै जियो र ऊ मर्‍यो ।
ISSS SSI S ISIS
बहरेः हजज मुसम्मन अखरब अबतर मक्बूज
ISS SSS ISI SIS
तबील अखरम मक्बुज अस्तर
26/04/2012

गजलः सयौँ घुम्ती

गजलः सयौँ घुम्ती
¤आवाज शर्मा¤

सयौँ घुम्ती उकालो हो मेरो जिन्दगी ।
हरेक मोड्मा भिरालो हो मेरो जिन्दगी ।।
॰
उज्यालोमा रमाउँऽछौ के बुझ्छौ र खै ?
हूरी चल्दा दियालो हो मेरो जिन्दगी ।।
॰
तिमी आफ्नो खुशी भेट्छौ जल्दाखेरि म ।
म बाती हूँ उज्यालो हो मेरो जिन्दगी ।।
॰
छु खोज्दैमा हराएको आफ्नै स्वाभिमान् ।
र आफैमा तुँवालो हो मेरो जिन्दगी ।।
॰
कठै भन्दै छुरा धस्ने मेरै छातीमा ।
पराईको अँगालो हो मेरो जिन्दगी ।।
ISSS ISSS SS SIS
बहर: मुजारे महजुफ अखरम
28/04/2012

गजलः जिन्दगी बहार हो

गजलः जिन्दगी बहार हो
¤आवाज शर्मा¤
॰
जिन्दगी बहार हो र पो छल्कियो ।
माधुरी सुवासमा कोही पल्कियो ।।
॰
खै कहाँ कहाँ थियौ यहाँ भेटियौ ।
चाहमा उमङ्गको दियो सल्कियो ।।
॰
ढुक्ढुकी बढ्यो यसै तिमी भेटिँदा ।
लाजले नजानिदो नजर ढल्कियो ।।
॰
खोज्दथेँ म फूलमा छु या पातमा ।
शीत भै अधर भरी नशा टल्कियो ।।
॰
चाँदनी तिमी कहाँ, म 'बाला' कहाँ ?
हातमै टिपू कि झैँ रहर झल्कियो ।।
SISI SISI SSIS
बहरे जदीद मक्फूफ/कबीर मुतव्वी
01/04/2012

गजलः केही फेरिएन

गजलः केही फेरिएन
¤आवाज शर्मा¤

उस्तै रह्यो गाउँबस्ती आँगन फेरिएन ।
सपनाहरू फेरिदैछन् जीवन फेरिएन ।।

बन्दै भुरे टाकुरेका रैती फेरि फेरि ।
राजाहरू मात्र बद्ल्यौँ सासन फेरिएन ।।

उस्तै दमन त्रास उस्तै के पो बद्लियो र ?
रोप्छौँ सँधै युद्धको शूल क्रन्दन फेरिएन ।।

युगदेखिको दासता यो डस्छ रुप फेरेर ।
गाँठा अनेक पल्ट फेर्र्यौँ बन्धन फेरिएन ।।

हाम्रै रहरमाथि चढ्दै खेले हाम्रै शिकार ।
रुप फेरिए साध्यका खै! साधन फेरिएन ।।
31/03/2012
SSIS SISS SS SISS
बहरे मुजास मक्तुअ

गजलः खबर उही थियो

गजलः खबर उही थियो
¤आवाज शर्मा¤
॰
राज मात्रै फरक थिए नजर उही थियो ।
दृष्य मात्रै फरक थिए खबर उही थियो ।।
॰
लाग्छ प्रत्येक प्रहारको म नै जवाफ हूँ
घात मात्र फरक थिए असर उही थियो ।।
॰
भीडसंगै सराबरी अलग कथा ब्यथा ।
स्वप्न मात्रै फरक थिए शहर उही थियो ।।
॰
पुग्नु टाढा थियो कतै पराइ झैँ थियौँ ।
यात्रु मात्रै फरक थिए सफर उही थियो ।।
॰
आगो झोसी सँधै यता उता निभाउँथ्यौ ।
काम मात्रै फरक थिए कदर उही थियो ।।
SIS SIS ISIS ISIS
बहरः रमल महजूफ मक्बूज/हजज अस्तर मक्बूज
15/03/2011

गजलः हार्नेलाई सोध

गजलः हार्नेलाई सोध
¤आवाज शर्मा¤
॰
जिन्दगीको मूल्यऽ हार्नेलाई सोध ।
भूमरीमा आफै पार्नेलाई सोध ।
॰
डुब्न सक्छन् आशा, चल्छ आँधी हूरी ।
तिर्सनाको डुंगा तार्नेलाई सोध ।
॰
प्रेमभित्रै धोका, बाध्यता वा इच्छा ?
फूलसंगै काँढा सार्नेलाई सोध ।।
॰
मर्म के हो फूलको ? धर्म के ले हुन्छ ?
पुज्छु भन्दै भैँमा झार्नेलाई सोध ।
॰
रेट्न सक्छौ घाँटी, थुन्न सक्छौ आवाज!
ढाल्न सक्छौ आस्था ? मार्नेलाई सोध ।।
SISS SS SISS SS
बहरे मदीद मक्तुअ
11/03/2012

गजलः कहीँ छ होला र ?

गजलः कहीँ छ होला र ?
¤आवाज शर्मा¤
॰
सोध्छौ तिमी अझै तर्ने जङ्घार कहीँ छ होला र ?
देशै डुबे यो झैँ ठूलो मझधार कहीँ छ होला र ?
॰
मीठा वचन, सफा पहिरन, चिल्लो बदन हजुरकै भो
सोँचै कुरुप छोपौँ भन्दा श्रृङ्गार कहीँ छ होला र ?
॰
कस्तो लुछा-चुँडी हो यो घर पोलेको खरानीमा
त्यसमा सरी मुनाफाको व्यापार कहीँ छ होला र ?
॰
उन्माद जो, छ सत्तामा सम्पत्तिको र शक्तिऽको ।
आफ्नैको खून नपिऽएको दरवार कहीँ छ होला र ?
॰
धामी उही, उही बोक्सी यो राष्ट्रको अहोभाग्य ।
साँच्चै भनूँ ? मेरै जस्तो सरकार कहीँ छ होला र ?
(SSIS ISSS)x2
05/03/2012

गजलः बिधाताले

गजलः बिधाताले
¤आवाज शर्मा¤
॰
अस्तित्वको युद्ध चल्यो गुहार माग्यो विधाताले ।
सबैभन्दा मुर्ख आफ्नै नाम राख्यो विधाताले ।।
॰
लुट्यो चोर्‍यो ढाँट्यो ठग्यो डरायो र मन्दिर पस्यो ।
सिक्का राखी ढोग्दा उस्ले भीख ठान्योविधाताले ।।
॰
मिल्किएको ढुंगो टिपी फूल चढायो बटुवाले ।
त्यहीँ परेवा बलि दिदा विवेक माग्यो विधाताले ।।
॰
पाखण्डी र आडम्बरी भक्तहरू गला थिच्छन् ।
इमान्दार को ? प्रश्न उठ्दा नास्तिक छान्यो विधाताले ।।
20/09/2011

गजलः आफू परी सयौँ टुक्रा

गजलः आफू परी सयौँ टुक्रा
¤आवाज शर्मा¤

आफू परी सयौँ टुक्रा छायाँ जुट्यो यसैपाली ।
सोध्दै थिएँ म को हूँला ? ऐना फुट्यो यसैपाली ।।

दीयो बल्यो जल्यो बाती सोच्दैथिएँ ढल्यो राती ।
हूरी बन्यो निधार मेरै, आयो चुट्यो यसैपाली ।।

आफ्ना हुँदा सबै टाढा माया कतै थियो गाढा ।
नाता टुट्यो सहेकै हूँ दिऽलै टुट्यो यसैपाली ।।

छाडी कतै गए झैँ भो छाती चिरा भए झैँ भो ।
ती हात छुटे छुटून् भन्थेँ साथै छुट्यो यसैपाली ।।

हूँ भन्दथ्यो असल साथी बिश्वास थियो उसै माथि ।
जस्को परेँ भरोशामा उस्ल्यै लुट्यो यसैपाली ।।
SSIS ISSS, SSIS ISSS
बहरेः खफीफ मक्तुअ मख्बून मुदाइफ

गजलः अचेल सम्झनामा

गजलः अचेल संझनामा
¤आवाज शर्मा¤
¤
दुख्यो, दुख्छ छाती अचेल संझनामा ।
दुखे मान्छु जाती अचेल सम्झनामा ।।
¤
कतै चस्स घोच्दै चिरा पार्छ आशा ।
रुँदै बित्छ राती अचेल सम्झनामा ।।
¤
गयो फेरि फर्की र ऊ आउँदैन ।
रह्यो याद घाती अचेल सम्झनामा ।।
¤
उज्यालो छ प्यारो दियोकै छ पूजा ।
जल्यो जल्छ बाती अचेल सम्झनामा ।।
¤
गरी लाख बिन्ती फगत ढुङ्गो ढोगेँ ।
सुक्यो फूलपाती अचेल सम्झनामा ।।
।ऽऽ ।ऽऽ ।ऽऽ ।ऽऽ
20/02/2012

गजलः भन्यौ रे हो ?

गजलः भन्यौ रे हो ?
¤आवाज शर्मा¤
॰
भन्यौ रे हो ? नपढ्नेको दिमाग बोधो हुन्छ ।
र ढाँटेसी झुटो बाँङ्गो समेत सोझो हुन्छ ।।
॰
नजानूँला, छलिञ्जेली अनेक रङ पोतेर ।
कुरुप मनको छ जो उस्कै शरीर गोरो हुन्छ ।।
॰
गुन्यू चोली लगाएकी भेट्यौ हेप्यौ फेरि ।
लुगा छोटो लगाउनेको सोँचै खोटो हुन्छ।।
॰
जरूवाको चिसो पानी पिएको हूँ पाखे ।
त्यही पानी सरी मनमा माया चोखो हुन्छ।।
॰
यिनै हातमा धुलो देखी छि भन्ने ए मैयाँ ।
मेरा यी हात धोए तिम्रो शहर भोको हुन्छ ।।
09/02/2012

गजलः फेरिएछ

गजलः फेरिएछ
¤आवाज शर्मा¤
¤
हात उस्तै घात उस्तै मात्र तरबार फेरिएछ ।
खिस्स हाँसी छेउ डाक्यौ देख्छु ब्यापार फेरिएछ ।।
¤
बारुलाकै हो गुनासो, फूल घाती रै छ भन्थ्यो
फूललाई हुन्छ फाँसी न्याय सँस्कार फेरिएछ ।।
¤
आज टेबुल माथिबाटै हात थापी माग्छ हाकिम ।
माथिसम्मै भाग पुग्थ्यो लाग्छ खरदार फेरिएछ ।।
¤
हुन्छ यौटा रङ उडे झैँ देख्छु अर्को चम्किदैछ ।
या त जाग्यो अख्तियार नै या त सरकार फेरिएछ ।।
¤
सत्य मात्रै बोल्छ 'आवाज' पागलै हो भन्ने गर्थ्यो।
दम्भ भत्क्यो दूनियाँको आज आधार फेरिएछ ।
(रमल)
23/01/2012

गजलः क्यै छ तिम्रो भन्नु बाँकी

गजलः क्यै छ तिम्रो भन्नु बाँकी
¤आवाज शर्मा¤
¤
रोप्छु काँढा राख्छु बाँझो, क्यै छ तिम्रो भन्नु बाँकी ?
हो म पक्कै पिउँछु आगो क्यै छ तिम्रो भन्नु बाँकी ??
¤
रुन्न भन्दा आँशु झर्छन् थाम्न खोज्यो थामिदैनन् ।
मन कसैको हुन्न सानो क्यै छ तिम्रो भन्नु बाँकी ??
¤
आज छुट्ला भोलि जुट्ला छुट्छ माया जुट्छ फेरि ।
यो अरूको हैन चासो क्यै छ तिम्रो भन्नु बाँकी ??
¤
पुग्नुपर्ने ठाउँ एउटै मिल्नु आखिर माटोमै हो ।
को कहाँको को कहाँको क्यै छ तिम्रो भन्नु बाँकी ??
¤
मैँ नजान्ने मैँ नबुझ्ने भो तिमी नै छौ बुझेको ?
पाडो लाटो काग बाठो क्यै छ तिम्रो भन्नु बाँकी ??
¤
हो, नबोली भित्र भित्रै गुम्सिएको रै छ आवाज
आज पक्कै बोल्छ लाटो क्यै छ तिम्रो भन्नु बाँकी ??
ऽ।ऽऽ ऽ।ऽऽ ऽ।ऽऽ ऽ।ऽऽ
20/01/2012

गजलः आफै सम्हालिन्छु

गजलः आफै सम्हालिन्छु
¤आवाज शर्मा¤
¤
म तड्पिन्छु आफै रुन्छु आफै सम्हालिन्छु ।
र, मन थाम्न आशा बुन्छु आफै सम्हालिन्छु ।।
¤
हरेकपल्ट धोका हुन्छ फूलको कुरा चल्दा ।
अनायास काँढा चुन्छु आफै सम्हालिन्छु ।।
¤
घुँडासम्म बाढी हो नि के को भयो चिन्ता ?
भई ढुक्क आँखा थुन्छु आफै सम्हालिन्छु ।।
¤
तिमी हिड्न सक्दैनौ र लड्छौ उज्यालोमा ।
हुरीमा म दीयो हुन्छु आफै सम्हालिन्छु ।।
¤
म हूँ अग्नि पथको यात्रु खेल्दै चुनौतीमा ।
खुशी भै म आगो छुन्छु आफै सम्हालिन्छु ।।
¤
नबोल्दा म जाती मान्छु आवाज झुटो लाग्छ ।
म ती मौन आँखा सुन्छु आफै सम्हालिन्छु ।।
।ऽऽ ।ऽऽऽ ।ऽऽ ।ऽऽऽ
(तबील)
10/01/2012