गजलः किनारमा पाएँ आज

गजलः किनारमा पाएँ आज
¤आवाज शर्मा¤

मझधारमा हराएथेँ किनारमा पाएँ आज ।
टप्प टिप्यौ शीरमा लायौ श्रृँगारमा पाएँ आज ।।

आफ्नो भन्नु अरू को छ? तिम्ले बुझ्यौ मैले बुझेँ ।
सारा कसम फिका भए निधारमा पाएँ आज ।।

भन्थ्यो कोही जिउन जाने प्याला भित्रै शान्ति मिल्छ ।
बजारिया शान्ति खोज्दा तरवारमा पाएँ आज ।।

कस्तुरीले वास खोज्दै सारा बन चहारेछ ।
हराएको देश आफ्नै दरवारमा पाएँ आज ।।

मनै मन बाट कुनै 'आवाज' आयो स्विकृतिको ।।
बल्ल आज जिन्दगीको आधारमा पाएँ आज ।।
26/03/2067