गजलः तिर्सनाको बाली

गजलः तिर्सनाको बाली
¤ आवाज शर्मा¤

आफ्नै पाखा, पखेरामा, तिर्सनाको, बाली राम्रो ।
मनको मल, पानी छरे, पसिनाको डाली राम्रो ।।

जहाँ झुल्छन्, लहलह, अपेक्षाका, बालाहरू ।
आफ्नै फाँट, टारी, बेसी, खेतका कान्ला, आली राम्रो ।।

सयौँ तले, अट्टालिका, जहाँ मीठो, नीँद छैन ।
ओँत दिने, तारामण्डल, आफ्नै खरको, पाली राम्रो ।।

पाल्सी कुरा, ख्याल ठट्टा, उस्तै प्यारो, बदमासी ।
जिस्काउँदा, मनकारीको, ममताको, गाली राम्रो ।।

सुनका अण्डा, पार्ने कुनै, बनचरीको, मोह छैन ।
एक अञ्जुली, पानी पाए, आफ्नै मेची, काली राम्रो ।।