गजलः कहिलेकाँही

गजलः कहिलेकाँही
¤आवाज शर्मा¤

मनै त हो वेदनाले तोडिन्छ यो कहिलेकाँही ।
आफै भन्दा कतै टाढा छोडिन्छ यो कहिलेकाँही ।।

सँधै सोझो कहाँ हुन्छ जिन्दगीको लामो यात्रा ?
कहीँ बाटो बिराएर मोडिन्छ यो कहिलेकाँही ।।

आसुँसँगै झर्नु पर्छ, व्यथासँगै जल्नुपर्छ ।
तीतामीठा पलसँगै गोडिन्छ यो कहिलेकाँही ।।

गाह्रो हुन्छ चिन्न पनि को बिरानो को आफन्त ।
झर्‍याम्म भै सीसासरी फोडिन्छ यो कहिलेकाँही ।।

भत्किएको साँघु जस्तो हुन्न रै छ मन
भन्नु ।
पलाएर अलिकति जोडिन्छ यो कहिलेकाँही ।।