गजलः सँगै हो नि

गजलः सँगै हो नि
¤आवाज शर्मा¤

माया भन्नु बत्ती न हो लोभिने त सँगै हो नि !
पर्ख पर्ख हे पुतली होमिने त सँगै हो नि !!

यिनै दुई नजरभित्र हजार आशा बाँचेका छन् !
कतै हाँसो कतै आँशु पोखिने त सँगै हो नि !!

सपनाको सानो गाउँ त्यहीँ हाम्रा रहर फुल्छन् !
बस्तीभित्र कुहिरो पसे छोपिने त सँगै हो नि !!

कुनै मेरा कुनै तिम्रा केही दोष यो समाजका !
दुख्दा छाती तोडिँदा मन तोडिने त सँगै हो नि !!

कहाँ सम्म कुद्ने रै छस् ए जिन्दगी म भन्दा तँ !
धुक्धुकीको चाल रुक्दा रोकिने त सँगै हो नि !!
08/12/2011