गजलः स्वाहा

गजलः स्वाहा
¤आवाज शर्मा¤

आधीबैँस किताब कापी बोक्दाबोक्दै स्वाहा ।
गाह्रा सूत्र हिसाब उस्तै घोक्दाघोक्दै स्वाहा ।।

भाको हो कि पढी ठूलो हात्ती जस्तै ठानी ।
बाँधी बाँध रहर मनका रोक्दारोक्दै स्वाहा ।।

यौटा फूल झर्‍यो भैँमा कोही आयो कुल्च्यो ।
दोषी कर्म भन्यो थाप्लो ठोक्दाठोक्दै स्वाहा ।।

खुल्यो होश उमेर घर्क्यो जाने बाटै छैन ।
बाँकीबैँस गिलासको झोल धोक्दाधोक्दै स्वाहा ।।

आफ्नै रीति गलत हो या आफै दोषी हो खै ?
डुब्दो जून भयो जूनी खोक्दाखोक्दै स्वाहा ।।