गजलः सुनुँसुनूँ लाग्यो ।

गजलः सुनुँसुनूँ लाग्यो ।
¤ आवाज शर्मा¤

तिमी बोल सुन्छु है त ? सुनुँसुनूँ लाग्यो ।।
मायाको फूल उन्छु है त ? उनुँउनूँ लाग्यो ।।

भत्केला कि संगालेको , मनको दह मेरो ?
बाँध बाँधी थुन्छु है त ? थुनुँथुनूँ लाग्यो ।

आफ्नै भन्दा तिम्रो माया, थपिदैँछ अझै
अझै थप्न गुन्छु है त ? गुनुँगुनूँ लाग्यो ।

प्रकृतिका हजारौँ रङ, आँखा वरिपरि ।
तिम्रै रुप चुन्छु है त ? चुनुँचुनूँ लाग्यो ।।

बरालिने मनै त हो, जालमा पारूँ जस्तो ?
माकुरी जाल बुन्छु है त ? बुनुँबुनूँ लाग्यो ।।