गजलः हाम्रो कथा
¤आवाज शर्मा¤
.
तिम्रो मेरो कथा कस्तो तप्केनीको आलीजस्तो
कहिल्यै फल नलागेको ओसेपको बालीजस्तो
.
जताततै फूलेका छन् खुशीहरू बगैँचामा
हराभरा बोट भन्छ्यौ फूल झरेको डालीजस्तो
.
आफन्त र पराई भन्नु हेराइ मात्र फरकफरक
मलाई त्यही अर्ती हुन्छ तिम्लाई त्यही गालीजस्तो
.
एउटै हुन्छ नाप्ने बस्तु एउटै हो नापो तर
मलाई आधा भरी लाग्छ तिम्लाई आधा खालीजस्तो
.
आऊ अब मिलाउनुछ हाम्रा फरक मनहरू
हामी फूल बनेमात्रै हाम्रो माया मालीजस्तो
No comments:
Post a Comment